1 Коринтјаните

А во врска со храната жртвувана на идоли: знаеме дека сите имаме знаење. Знаењето возгордува, а љубовта изградува.

Ако некој мисли дека знае нешто, сѐ уште не познал како што треба.

Но ако некој Го љуби Бог, тој е познат од Него.

Значи, во врска со јадењето храна жртвувана на идоли, знаеме дека идолот не е ништо во светот и дека нема друг Бог освен Единиот.

Зашто иако има таканаречени богови, било на небото, било на земјата, како што има многу богови и многу господари,

за нас има еден Бог – Таткото, од Кого е сѐ и за Кого сме ние; и еден Господ – Исус Христос, преку Кого е сѐ и преку Кого сме ние.

Но тоа знаење не го имаат сите. Некои, бидејќи досега биле навикнати на идолите, ја јадат храната како навистина да му е жртвувана на идол, и нивната слаба совест се осквернува.

Храната не нѐ приближува до Бог: ниту губиме нешто ако не јадеме, ниту добиваме нешто ако јадеме.

Но внимавајте оваа ваша слобода да не стане причина за сопнување на слабите.

Зашто ако некој те види тебе, кој имаш знаење, како седиш на трпеза во идолски храм, нема ли и тој, иако совеста му е слаба, да се охрабри да јаде од идолските жртви?

И така, поради твоето знаење пропаѓа слабиот брат за кого Христос умре.

Така, грешејќи против браќата и ранувајќи ја нивната слаба совест, грешите против Христос.

Затоа, ако храната го наведува мојот брат на грев, никогаш повеќе нема да јадам месо, за да не го наведам својот брат на грев.