Амос

Чујте го овој збор, васански крави, вие што сте на Самариската гора, што ги угнетувате сиромашните, ги притискате бедните и им велите на своите господари: „Донесете да пиеме!“

Господ Бог се заколна во Својата светост: „Ете, доаѓаат денови врз вас кога ќе ве извлечат со куки, а вашиот остаток со рибарски јадици.

Ќе излезете низ пробиените ѕидови, секоја право пред себе, и ќе бидете исфрлени кон Хармон,“ вели Господ.

„Одете во Бет-Ел и грешете, во Галгал умножувајте ги престапите; принесувајте ги своите жртви секое утро, своите десетоци на секои три дена.

Принесувајте благодарствена жртва од квасен леб, разгласувајте ги доброволните приноси и објавувајте ги, зашто тоа го сакате, Израелеви синови,“ вели Господ Бог.

„И Јас ви дадов чисти заби во сите ваши градови и недостиг од леб во сите ваши места; сепак не се вративте кај Мене,“ вели Господ.

„Јас ви го задржав дождот кога остануваа уште три месеци до жетвата; пуштав дожд над еден град, а над друг не пуштав; една нива добиваше дожд, а другата, врз која не врнеше, се сушеше.

Така два или три града талкаа до еден град за да пијат вода, но не се наситуваа; сепак не се вративте кај Мене,“ вели Господ.

„Ве поразував со суша и мувла; вашите многубројни градини и лозја, вашите смокви и маслинки ги изедоа глодачките скакулци; сепак не се вративте кај Мене,“ вели Господ.

„Пуштав врз вас помор како во Египет; со меч ги убивав вашите младичи и ги одведував вашите коњи во плен; ја кренав смрдеата од вашите логори до вашите ноздри; сепак не се вративте кај Мене,“ вели Господ.

„Некои од вас ги соборив како што Бог ги собори Содом и Гомор, и бевте како гламња истргната од огнот; сепак не се вративте кај Мене,“ вели Господ.

„Затоа вака ќе постапам со тебе, Израеле; и бидејќи вака ќе постапам со тебе, подготви се да Го сретнеш својот Бог, Израеле!“

Зашто, ете, Тој ги создава планините и го создава ветерот, му открива на човекот каква е неговата мисла, ја претвора зората во темнина и оди по височините на земјата — Господ, Бог над војските, е Неговото име.