5 Мојсеева — Второзаконие

Кога ќе излезеш во бој против своите непријатели и ќе видиш коњи, бојни коли и народ поброен од тебе, не се плаши од нив, зашто со тебе е Господ, твојот Бог, Кој те изведе од Египетската земја.

Кога ќе се приближите до бојот, свештеникот нека пристапи и нека му зборува на народот.

Нека им рече: „Слушај, Израеле! Денес излегувате во бој против своите непријатели. Вашето срце да не ослабне; не се плашете, не се вознемирувајте и не се ужаснувајте од нив.

Зашто Господ, вашиот Бог, оди со вас, за да се бори за вас против вашите непријатели и да ве спаси.“

Потоа надзорниците нека му речат на народот: „Кој изградил нов дом, а уште не се вселил во него, нека се врати дома, за да не загине во бој, па друг да се всели во него.

Кој засадил лозје, а уште не го користел неговиот плод, нека се врати дома, за да не загине во бој, па друг да го користи плодот.

Кој се свршил со жена, а уште не се оженил со неа, нека се врати дома, за да не загине во бој, па друг да се ожени со неа.“

Надзорниците нека продолжат да му зборуваат на народот: „Кој се плаши и е малодушен, нека се врати дома, за да не ги обесхрабри и своите браќа како што е обесхрабрен самиот.“

Кога надзорниците ќе завршат со зборувањето пред народот, нека постават воени заповедници на чело на војската.

Кога ќе се приближиш до некој град за да се бориш против него, најнапред понуди му мир.

Ако мирно ти одговори и ти ги отвори портите, целиот народ што е во него нека ти плаќа данок и нека ти служи.

Но ако не склучи мир со тебе, туку завојува против тебе, тогаш опколи го.

Кога Господ, твојот Бог, ќе го предаде во твоите раце, погуби ги со меч сите мажи во него.

А жените, децата, добитокот и сѐ што има во градот – целиот негов плен – земи го за себе. Јади го пленот од своите непријатели, што ти го дал Господ, твојот Бог.

Така постапувај со сите градови што се многу далеку од тебе и што не им припаѓаат на градовите на овдешните народи.

Но во градовите на овие народи, што Господ, твојот Бог, ти ги дава како наследство, не оставај живо ништо што дише.

Целосно уништи ги Хетејците, Аморејците, Хананците, Ферезејците, Евејците и Јевусејците, како што ти заповеда Господ, твојот Бог,

за да не ве научат да ги правите сите одвратности што тие ги правеле за своите богови, па да згрешите против Господ, вашиот Бог.

Кога долго време опсадуваш некој град и се бориш против него за да го освоиш, не ги уништувај неговите дрвја со секира, зашто можеш да јадеш од нив. Не ги сечи; зар полското дрво е човек, па да биде опсадено од тебе?

Можеш да ги уништуваш и сечеш само дрвјата за кои знаеш дека не даваат храна, и од нив да градиш опсадни направи против градот што војува со тебе, сѐ додека не го освоиш.