5 Мојсеева — Второзаконие

Ако некој земе жена и се ожени со неа, но таа не најде милост во неговите очи затоа што открил кај неа нешто срамно, нека ѝ напише разводно писмо, нека ѝ го даде во рака и нека ја испрати од својот дом.

Откако ќе излезе од неговиот дом, таа може да се омажи за друг маж.

Но ако и вториот маж ја намрази, ѝ напише разводно писмо, ѝ го даде во рака и ја испрати од својот дом, или ако умре вториот маж што ја зел за жена,

нејзиниот прв маж, кој ја отпуштил, не смее повторно да ја земе за жена откако била осквернета, зашто тоа Му е одвратно на Господ. Не навлекувај грев врз земјата што Господ, твојот Бог, ти ја дава во наследство.

Кога некој неодамна се оженил, да не оди во војна и да не му се наложува никаква друга должност. Нека биде слободен во својот дом една година и нека ја радува жената што ја зел.

Никој да не зема рачна мелница или горниот мелнички камен како залог, зашто со тоа зема човечки живот како залог.

Ако се открие дека некој украл некого од своите браќа, од Израелевите синови, постапувал со него како со роб или го продал, тој крадец нека биде погубен. Така ќе го отстраниш злото од својата средина.

Внимавај во случај на лепра строго да пазиш и да постапуваш според сѐ што ќе те поучат левитските свештеници; внимателно исполнувај го она што им го заповедав.

Спомни си што ѝ направи Господ, твојот Бог, на Маријам по патот, кога излеговте од Египет.

Кога ќе му дадеш нешто на заем на својот ближен, не влегувај во неговиот дом за сам да го земеш залогот.

Стој надвор, а човекот кому му даваш заем нека ти го изнесе залогот.

Ако човекот е сиромашен, не легнувај да спиеш додека неговиот залог е кај тебе.

Задолжително врати му го залогот при зајдисонце, за да може да спие во својата облека и да те благослови. Тоа ќе ти се смета за праведност пред Господ, твојот Бог.

Не угнетувај наемник што е сиромашен и беден, било да е од твоите браќа или од туѓинците што живеат во твојата земја, во твоите градови.

Исплати му ја надницата истиот ден, пред да зајде сонцето, зашто е сиромашен и на неа се надева; инаку може да извика против тебе кон Господ, и тоа ќе ти биде грев.

Татковците да не бидат погубувани поради децата, ниту децата поради татковците; секој нека биде погубен за својот грев.

Не ја извртувај правдата на туѓинецот и на сирачето, и не ја земај облеката на вдовицата како залог.

Спомни си дека беше роб во Египет и дека Господ, твојот Бог, те откупи оттаму; затоа ти заповедам да го правиш ова.

Кога ќе ја жнееш својата нива и ќе заборавиш сноп на нивата, не се враќај да го земеш. Нека остане за туѓинецот, сирачето и вдовицата, за да те благослови Господ, твојот Бог, во секое дело на твоите раце.

Кога ќе ги тресеш своите маслинки, не поминувај повторно по гранките; останатото нека биде за туѓинецот, сирачето и вдовицата.

Кога ќе го береш своето лозје, не пребирај повторно; останатото нека биде за туѓинецот, сирачето и вдовицата.

Спомни си дека беше роб во Египетската земја; затоа ти заповедам да го правиш ова.