2 Мојсеева — Излез

Потоа Бог му рече на Мојсеј: „Искачете се кај Господ, ти и Арон, Надав и Авиуд, и седумдесетмина од Израелевите старешини, и поклонете се оддалеку.

Само Мојсеј нека се приближи до Господ; другите да не се приближуваат, а народот да не се искачува со него.“

Мојсеј дојде и му ги кажа на народот сите Господови зборови и сите закони. Целиот народ едногласно одговори: „Ќе направиме сѐ што рече Господ.“

Мојсеј ги запиша сите Господови зборови. Рано следното утро изгради жртвеник во подножјето на планината и постави дванаесет камени столбови според дванаесетте Израелеви племиња.

Испрати млади луѓе од Израелевите синови, и тие Му принесоа на Господ жртви паленици и жртвуваа јунци како жртви за мир.

Мојсеј зеде половина од крвта и ја стави во садови, а со другата половина го попрска жртвеникот.

Потоа ја зеде Книгата на заветот и ја прочита пред народот. Тие рекоа: „Ќе правиме сѐ што рече Господ и ќе бидеме послушни.“

Мојсеј ја зеде крвта, го попрска народот и рече: „Еве ја крвта на заветот што Господ го склучи со вас врз основа на сите овие зборови.“

Потоа се искачија Мојсеј и Арон, Надав и Авиуд, и седумдесетмина од Израелевите старешини.

Го видоа Израелевиот Бог. Под Неговите нозе имаше нешто како плоча од сафир, чиста како самото небо.

Тој не ја крена Својата рака против избраните од Израелевите синови; тие Го видоа Бог, па јадеа и пиеја.

Господ му рече на Мојсеј: „Искачи се кај Мене на планината и остани таму. Ќе ти ги дадам камените плочи со законот и заповедите што ги напишав, за да го поучуваш народот.“

Мојсеј стана со својот помошник Исус Навин, и се искачи на Божјата планина.

На старешините им рече: „Чекајте нѐ овде додека не се вратиме кај вас. Ете, Арон и Ор се со вас; кој има спор, нека оди кај нив.“

Мојсеј се искачи на планината, а облакот ја покри планината.

Господовата слава почиваше на Синајската планина, и облакот ја покриваше шест дена. На седмиот ден Господ го повика Мојсеј од средината на облакот.

Пред очите на Израелевите синови изгледот на Господовата слава беше како оган што проголтува на врвот од планината.

Мојсеј влезе во средината на облакот и се искачи на планината. Остана на планината четириесет дена и четириесет ноќи.