Езекиел

„А ти, крени тажачка песна за водачите Израелеви.

Кажи: ‚Каква беше твојата мајка? Лавица меѓу лавови! Лежеше меѓу младите лавови и ги одгледуваше своите младенчиња.

Одгледа едно од своите младенчиња и тоа стана млад лав. Научи да распарчува плен и почна да проголтува луѓе.

Народите чуја за него. Беше фатен во нивната јама и со куки го одведоа во египетската земја.

Кога лавицата виде дека чекањето е залудно и нејзината надеж пропадна, зеде друго од своите младенчиња и го направи млад лав.

Тој се движеше меѓу лавовите и стана млад лав. Научи да распарчува плен и проголтуваше луѓе.

Ги разурнуваше нивните тврдини и ги опустошуваше нивните градови. Земјата и сѐ што беше во неа се ужаснуваа од звукот на неговото рикање.

Тогаш народите од околните земји се кренаа против него, ја раширија својата мрежа над него и тој беше фатен во нивната јама.

Го ставија во кафез со куки и го одведоа кај вавилонскиот цар. Го однесоа во тврдина, за неговиот глас повеќе да не се слуша по планините Израелеви.

Твојата мајка беше како лоза засадена покрај вода. Беше плодна и полна со гранки поради изобилството вода.

Израснаа силни гранки погодни за владетелски жезли. Се издигна високо меѓу густите гранки и се забележуваше по својата височина и по мноштвото гранки.

Но во гнев беше искорната и фрлена на земја. Источниот ветер ѝ го исуши плодот; силните гранки ѝ беа скршени и се исушија, а огнот ги проголта.

Сега е засадена во пустина, во сува и жедна земја.

Оган излезе од една од нејзините главни гранки и го проголта нејзиниот плод. Не ѝ остана силна гранка што би можела да стане владетелски жезол.‘ Ова е тажачка песна и ќе остане тажачка песна.“