Осија

Не радувај се, Израеле, како што се радуваат народите, зашто блудствуваше, оддалечувајќи се од својот Бог; ја засака блудничката плата по сите гумна за жито.

Гумното и пресата нема да ги хранат, а ширата (виното) ќе ги изневери.

Нема повеќе да живеат во Господовата земја; Ефрем ќе се врати во Египет, а во Асирија ќе јадат нечиста храна.

Нема да Му принесуваат вински преливи на Господ, ниту нивните жртви ќе Му бидат угодни; тие ќе им бидат како леб на ожалостени. Секој што ќе јаде од него ќе се оскверни, зашто нивниот леб ќе биде само за нив и нема да влезе во Господовиот дом.

Што ќе правите во денот на свечениот собир и во денот на Господовиот празник?

Зашто, ете, тие ќе заминат поради пустошењето; Египет ќе ги собере, Моф ќе ги погребе; коприви ќе ги прекријат нивните сребрени богатства, а трње ќе има во нивните шатори.

Дојдоа деновите на казната, дојдоа деновите на отплатата; Израел ќе го разбере тоа. Пророкот го сметаат за безумен, а човекот на духот за луд, поради твоето големо беззаконие и големата омраза.

Ефрем е стражар со мојот Бог; но пророкот е како стапица на птицоловец по сите негови патишта, а омраза има во домот на неговиот Бог.

Длабоко се расипаа, како во деновите на Гива; Тој ќе се сети на нивното беззаконие и ќе ги казни за нивните гревови.

„Го најдов Израел како грозје во пустина; ги видов вашите татковци како прв плод на смоква. Но тие отидоа кај Ваал-Пеор, му се посветија на срамното и станаа одвратни како она што го засакаа.

Славата на Ефрем ќе одлета како птица; нема да има ни раѓање, ни бременост, ни зачнување.

И ако ги одгледаат своите деца, Јас ќе ги оставам без нив, така што нема да остане човек. Тешко ним кога ќе се оддалечам од нив!

Ефрем, како што гледам, е како Тир, засаден на убаво место; но Ефрем ќе ги изведе своите деца пред убиецот.“

Дај им, Господи! Што ќе им дадеш? Дај им утроба што пометнува и суви гради.

„Сета нивна злоба е во Галгал; таму ги намразив поради злото на нивните дела. Ќе ги истерам од Мојот дом и нема повеќе да ги љубам; сите нивни водачи се бунтовници.

Ефрем е поразен; неговиот корен се исуши и нема да дава плод. Дури и да родат деца, Јас ќе им го одземам драгоцениот плод на нивната утроба.“

Мојот Бог ќе ги отфрли, зашто не Го послушаа; и ќе скитаат меѓу народите.