Исаија

Тешко на Ариел, Ариел, градот каде што се насели Давид! Додавајте година на година и нека се редат празниците.

Но Јас ќе го притиснам Ариел; ќе има жалост и лелекање, и ќе Ми стане како Ариел.

Ќе поставам логор околу тебе, ќе те опколам со насип и ќе подигнам опсадни утврдувања против тебе.

Ќе бидеш понижен и ќе зборуваш од земјата; твојот глас ќе доаѓа тивко од правта. Гласот ќе ти биде како глас на дух што излегува од земјата, а твоите зборови ќе шепотат од правта.

Но мноштвото на твоите непријатели ќе стане како ситен прав, а мноштвото на насилниците како плева што ја носи ветерот. Тоа ќе се случи ненадејно, во еден миг.

Господ над војските ќе дојде со гром, земјотрес и силен татнеж, со виор, бура и пламен од оган што проголтува.

Мноштвото на сите народи што војуваат против Ариел, сите што го опсадуваат, неговите тврдини и оние што го притискаат, ќе исчезнат како сон, како ноќно видение.

Ќе биде како кога гладен човек сонува дека јаде, но се буди со празен стомак; или како кога жеден сонува дека пие, но се буди изнемоштен и сѐ уште жеден. Таква ќе биде судбината на сите народи што војуваат против гората Сион.

Зачудете се и останете збунети! Заслепете се и останете слепи! Пијани се, но не од вино; се тетерават, но не од жесток пијалак.

Зашто Господ излеа врз вас дух на длабок сон; ги затвори вашите очи — пророците — и ги покри вашите глави — гледачите.

Целото видение ви стана како зборови од запечатена книга. Кога ќе му ја дадат на човек што знае да чита и ќе му речат: „Прочитај го ова“, тој ќе одговори: „Не можам, зашто книгата е запечатена.“

А кога книгата ќе му ја дадат на човек што не знае да чита и ќе му речат: „Прочитај го ова“, тој ќе одговори: „Не знам да читам.“

Господ рече: „Овој народ Ми се приближува со својата уста и Ме почитува со своите усни, но неговото срце е далеку од Мене; нивната стравопочит кон Мене се состои од човечки правила научени напамет.

Затоа повторно ќе направам чудесни дела меѓу овој народ — чудо врз чудо. Мудроста на неговите мудреци ќе исчезне, а разбирањето на разумните ќе се сокрие.“

Тешко на оние што длабоко ги кријат своите планови од Господ, чии дела се вршат во темнина и кои велат: „Кој нѐ гледа? Кој знае што правиме?“

Колку сте изопачени! Зар грнчарот треба да се смета исто како глината? Зар делото може да му рече на својот творец: „Тој не ме направил“? Или создаденото да му рече на оној што го создал: „Тој ништо не разбира“?

Зар нема уште сосема малку време, па Ливан ќе стане плодна нива, а плодната нива ќе се смета за шума?

Во тој ден глувите ќе ги слушнат зборовите од книгата, а очите на слепите ќе прогледаат од мракот и темнината.

Кротките уште повеќе ќе се радуваат во Господ, а најсиромашните меѓу луѓето ќе се веселат во Светиот на Израел.

Зашто насилникот ќе исчезне, потсмевачот ќе го снема и ќе бидат истребени сите што демнат за да прават зло;

оние што со збор го прават човекот виновен, што му поставуваат стапица на оној што брани правда при градската порта и со празни обвинувања го лишуваат праведниот од правдата.

Затоа вака вели Господ, Кој го откупи Авраам, за домот Јаковов: „Јаков повеќе нема да се срами и неговото лице нема да пребледува.

Зашто кога ќе ги види своите деца, делото на Моите раце, среде себе, тие ќе го сметаат Моето име за свето; ќе Го прославуваат Светиот на Јаков и ќе имаат стравопочит пред Бог на Израел.

Оние што грешеа во духот ќе стекнат разбирање, а оние што негодуваа ќе примат поука.“