Исаија

„Запеј, неротко, ти што не раѓаш! Избувни во радосна песна и воскликни, ти што не си почувствувала породилни болки! Зашто повеќе се децата на напуштената отколку децата на мажената“, вели Господ.

Прошири го местото на својот шатор; не штеди ги платната на своите живеалишта. Продолжи ги јажињата и зацврсти ги клиновите!

Зашто ќе се прошириш надесно и налево; твоето потомство ќе наследи народи и ќе ги насели опустошените градови.

Не плаши се, зашто нема да се засрамиш! Не срами се, зашто нема да бидеш посрамена. Ќе го заборавиш срамот на својата младост и повеќе нема да се сеќаваш на срамот од своето вдовство.

Зашто твојот Создател е како твој сопруг — Господ над војските е Неговото име; твојот Откупител е Светиот на Израел, Кој ќе биде наречен Бог на целата земја.

Зашто Господ те повика како напуштена жена со ожалостен дух, како жена од младоста што била отфрлена“, вели твојот Бог.

„За краток миг те оставив, но со голема милост ќе те соберам.

Во изблик на гнев за миг го скрив Своето лице од тебе, но со вечна љубов ќе ти покажам милост“, вели Господ, твојот Откупител.

„Ова за Мене е како во деновите на Ное: како што се заколнав дека водите на Ное повеќе нема да ја преплават земјата, така се заколнувам дека повеќе нема да се разгневувам на тебе ниту да те укорувам.

И планините да се поместат и ридовите да се разнишаат, Мојата милост нема да се оддалечи од тебе и Мојот завет на мирот нема да се разниша“, вели Господ, Кој има милост кон тебе.

„Ти измачена, фрлана од бура и неутешена! Ете, ќе ги поставам твоите камења во прекрасен малтер и ќе ти ги положам темелите со сафири.

Твоите кули ќе ги направам од скапоцени камења, твоите порти од блескави камења и целата твоја граница од скапоцени камења.

Сите твои синови ќе бидат поучени од Господ и голем ќе биде мирот на твоите синови.

Ќе бидеш утврдена во праведност. Ќе бидеш далеку од угнетување и нема да се плашиш; ужасот нема да ти се приближи.

Ако некој се крене против тебе, тоа нема да биде од Мене; кој ќе се крене против тебе, ќе падне пред тебе.

Ете, Јас го создадов ковачот што го разгорува јагленот во огнот и изработува оружје за својата работа; Јас го создадов и уништувачот што разорува.

Ниедно оружје направено против тебе нема да успее, и секој јазик што ќе се крене против тебе на суд ќе го осудиш. Тоа е наследството на Господовите слуги и нивната праведност доаѓа од Мене“, вели Господ.