Јов

Тогаш Јов одговори и рече:

„Внимателно слушнете ги моите зборови; нека тоа биде вашата утеха за мене.

Истрпете ме додека зборувам, а кога ќе завршам, тогаш потсмевајте се.

Зар мојата жалба е упатена кон човек? И зошто тогаш да не бидам нетрпелив?

Погледнете ме и зачудете се; ставете ја раката на својата уста.

Кога само ќе се сетам на сето ова, ме обзема страв и трепет ми го опфаќа телото.

Зошто безбожните живеат, доживуваат старост и стануваат сѐ помоќни?

Нивните деца растат пред нив, а своето потомство го гледаат со свои очи.

Нивните домови се безбедни и без страв, и Божјиот стап не е врз нив.

Нивниот бик оплодува и не промашува; нивната крава се тели и не го губи плодот.

Ги пуштаат своите деца како стадо, а нивните малечки весело играат.

Пеат со дајре и харфа и се веселат со звукот на свирката.

Ги поминуваат своите денови во благосостојба и во миг слегуваат во Шеол.

А сепак Му велат на Бог: ‚Оддалечи се од нас! Не сакаме да ги знаеме Твоите патишта.

Кој е Семоќниот, па да Му служиме? Каква корист ќе имаме ако Му се молиме?‘

Но нивната благосостојба не е во нивните раце. Советот на безбожните е далеку од мене.

Колкупати навистина згаснува светилката на безбожните? Колкупати ги снаоѓа нивната несреќа и Бог во Својот гнев им доделува маки?

Колкупати стануваат како слама пред ветерот и како плева што виорот ја разнесува?

Велите: ‚Бог ја чува казната за неговите синови.‘ Но нека му возврати нему, за самиот да го почувствува тоа!

Неговите очи нека ја видат сопствената пропаст и самиот нека пие од гневот на Семоќниот.

Зашто што ќе му значи неговиот дом по него, кога бројот на неговите месеци ќе биде пресечен?

Зар некој ќе Го учи Бог на знаење, Него, Кој им суди и на највозвишените?

Еден човек умира во полна сила, сосема спокоен и безгрижен;

неговото тело е полно со сила, а сржта на неговите коски е свежа.

Друг умира со огорчена душа, без никогаш да вкуси добро.

И двајцата заедно лежат во правта и црвите ги покриваат.

Ете, ги знам вашите мисли и замислите со кои неправедно ме напаѓате.

Зашто велите: ‚Каде е домот на моќниот? Каде е шаторот во кој живееја безбожните?‘

Зар не сте ги прашале патниците? Зар не ги препознавате нивните сведоштва,

дека злиот често е поштеден во денот на несреќата и одведен настрана во денот на гневот?

Кој ќе му го каже неговиот пат право в лице? Кој ќе му возврати за она што го направил?

Го носат до гробот и стража бдее над неговата гробница.

Земјата во долината му е лесна; по него одат сите луѓе, како што и пред него поминале безбројни.

Тогаш зошто ме тешите со празни зборови? Во вашите одговори останува само неверност.“