Псалми

Бог е нашето засолниште и нашата сила, сигурна и секогаш присутна помош во неволја.

Затоа нема да се плашиме, дури и ако земјата се разниша и планините се урнат во средината на морињата,

дури и ако морските води бучат и се пенат, а планините се тресат од нивната сила.

Низ Божјиот град тече река чии води го веселат, низ светото живеалиште на Севишниот.

Бог е среде него, затоа нема да се разниша; Бог ќе му помогне уште со првото утринско светло.

Народите се разбрануваа, царствата се разнишаа; Тој го пушти Својот глас, и земјата се растопи.

Господ над војските е со нас; Јакововиот Бог е нашето сигурно засолниште.

Дојдете и погледнете ги Господовите дела, видете какви опустошувања направи на земјата.

Тој ги запира војните до краиштата на земјата; го крши лакот, го прекршува копјето и ги гори бојните коли во оган.

„Смирете се и знајте дека Јас сум Бог; ќе бидам возвишен меѓу народите и возвишен по целата земја.“

Господ над војските е со нас; Јакововиот Бог е нашето сигурно засолниште.