Откровение

Потоа видов ново небо и нова земја, зашто првото небо и првата земја поминаа, а морето веќе го немаше.

Го видов и светиот град, Новиот Ерусалим, како слегува од небото од Бог, подготвен како невеста украсена за својот младоженец.

И слушнав силен глас од престолот како вели: „Ете, Божјото живеалиште е меѓу луѓето! Тој ќе живее со нив, тие ќе бидат Негови народи, а Самиот Бог ќе биде со нив.

Тој ќе ја избрише секоја солза од нивните очи. Смрт повеќе нема да има, ниту жалост, ниту плач, ниту болка, зашто поранешното помина.“

Тогаш Оној Кој седеше на престолот рече: „Ете, правам сѐ ново!“ И рече: „Напиши, зашто овие зборови се верни и вистинити.“

Потоа ми рече: „Се исполни! Јас сум Алфа и Омега, Почетокот и Крајот. На оној што е жеден бесплатно ќе му дадам од изворот на водата на животот.

Оној што победува ќе го наследи сето ова. Јас ќе му бидам Бог, а тој ќе Ми биде син.

Но плашливите, неверните, гнасните, убијците, блудниците, маѓепсниците, идолопоклониците и сите лажливци ќе го имаат својот дел во езерото што гори со оган и сулфур. Тоа е втората смрт.“

Тогаш дојде еден од седумте ангели што ги имаа седумте чаши исполнети со седумте последни неволји и ми рече: „Дојди, ќе ти ја покажам невестата, жената на Агнецот.“

Во Духот ме однесе на голема и висока гора и ми го покажа светиот град Ерусалим како слегува од небото од Бог.

Градот ја имаше Божјата слава, а неговиот сјај беше како најскапоцен камен, како јаспис, блескав како кристал.

Имаше голем и висок ѕид со дванаесет порти, а кај портите стоеја дванаесет ангели. На портите беа напишани имињата на дванаесетте племиња на синовите Израелеви.

Од исток имаше три порти, од север три, од југ три и од запад три.

Ѕидот на градот имаше дванаесет темели, а на нив беа дванаесетте имиња на дванаесетте апостоли на Агнецот.

Оној што зборуваше со мене имаше златна мерна трска за да ги измери градот, неговите порти и неговиот ѕид.

Градот беше поставен во квадрат; должината му беше колку и ширината. Го измери градот со трската: дванаесет илјади стадии. Должината, ширината и висината му беа еднакви.

Го измери и неговиот ѕид: сто четириесет и четири лакти, според човечка мерка, која ја употребуваше и ангелот.

Ѕидот беше изграден од јаспис, а градот беше од чисто злато, слично на чисто стакло.

Темелите на градскиот ѕид беа украсени со секаков скапоцен камен: првиот темел беше јаспис, вториот сафир, третиот халкидон, четвртиот смарагд,

петтиот сардоникс, шестиот сард, седмиот хризолит, осмиот берил, деветтиот топаз, десеттиот хризопрас, единаесеттиот хијацинт, дванаесеттиот аметист.

Дванаесетте порти беа дванаесет бисери; секоја порта беше направена од еден бисер. А градската улица беше од чисто злато, како проѕирно стакло.

Храм не видов во градот, зашто Господ Бог Семоќниот и Агнецот се неговиот храм.

На градот не му се потребни ни сонцето ни месечината за да му светат, зашто Божјата слава го осветлува, а Агнецот е неговата светилка.

Народите ќе одат во неговата светлина, а земните цареви ќе ја внесуваат својата слава во него.

Неговите порти нема да се затвораат преку ден, а ноќ таму нема да има.

Во него ќе ги внесуваат славата и честа на народите.

Во него нема да влезе ништо нечисто, ниту оној што прави гнасотија и лага, туку само оние чии имиња се запишани во книгата на животот на Агнецот.