1 Летописи

Филистејците војуваа против Израел. Израелците избегаа пред Филистејците и паѓаа убиени на гората Гелвуј.

Филистејците ги стигнаа Саул и неговите синови и ги убија Сауловите синови Јонатан, Авинадав и Малки-Суа.

Бојот стана многу жесток околу Саул. Стрелците го погодија, и тој беше тешко ранет.

Тогаш Саул му рече на својот оруженосец: „Извади го својот меч и прободи ме, за да не дојдат тие необрежани и да ми се потсмеваат.“ Но неговиот оруженосец не сакаше, зашто многу се исплаши. Затоа Саул го зеде својот меч и се фрли врз него.

Кога оруженосецот виде дека Саул умре, и тој се фрли врз својот меч и умре.

Така загинаа Саул, неговите три сина и целиот негов дом.

Кога сите Израелци што беа во долината видоа дека војската побегна и дека Саул и неговите синови загинаа, ги оставија своите градови и се разбегаа. Тогаш Филистејците дојдоа и се населија во нив.

Следниот ден, кога Филистејците дојдоа да ги ограбат убиените, ги најдоа Саул и неговите синови мртви на гората Гелвуј.

Го соблекоа, му ја отсекоа главата, му го зедоа оружјето и испратија гласници низ целата филистејска земја да им ја објават веста на своите идоли и на народот.

Неговото оружје го ставија во храмот на своите богови, а неговата глава ја закачија во храмот на Дагон.

Кога сите жители на Јавис во Галад слушнаа што му направија Филистејците на Саул,

сите храбри луѓе станаа, ги зедоа телото на Саул и телата на неговите синови, ги донесоа во Јавис и ги погребаа нивните коски под дабот во Јавис. Потоа постеа седум дена.

Така умре Саул поради својата неверност кон Господ: не го пазеше Господовиот збор, а побара совет и од жена што повикува духови.

Тој не Го праша Господ, па Господ го погуби и му го предаде царството на Давид, Есеевиот син.