1 Летописи

Го внесоа Божјиот ковчег и го поставија во шаторот што Давид го беше поставил за него. Потоа принесоа пред Бог жртви паленици и жртви за мир.

Кога Давид заврши со принесувањето на жртвите паленици и жртвите за мир, го благослови народот во името на Господ.

На секој Израелец, и на мажите и на жените, им даде по еден леб, парче месо и колач со суво грозје.

Потоа постави некои од левитите да служат пред Господовиот ковчег, да Го спомнуваат, да Му благодарат и да Го слават Господ, Израелевиот Бог.

Асаф беше водач, а по него Захарија; потоа Јеиил, Семирамот, Јехиил, Мататија, Елијав, Ванеја, Овид-Едом и Јеиил, кои свиреа на лири и харфи, додека Асаф свиреше на кимвали.

Свештениците Ванеја и Јазиил постојано трубеа со труби пред ковчегот на Божјиот завет.

Тој ден Давид првпат им ја предаде на Асаф и на неговите браќа оваа песна за благодарност кон Господ:

„Благодарете Му на Господ и повикувајте го Неговото име; објавувајте ги Неговите дела меѓу народите.

Пејте Му, пејте Му псалми; раскажувајте за сите Негови чудесни дела.

Фалете се со Неговото свето име; нека се радува срцето на оние што Го бараат Господ.

Барајте Го Господ и Неговата сила; секогаш барајте го Неговото лице.

Спомнувајте ги чудесните дела што ги направи, Неговите знаци и пресудите од Неговата уста,

вие, потомци на Израел, Неговиот слуга, вие, синови Јаковови, Негови избраници.

Тој е Господ, нашиот Бог; Неговите пресуди се по целата земја.

Секогаш спомнувајте го Неговиот завет, зборот што го заповеда за илјада поколенија,

заветот што го склучи со Авраам и заклетвата што му ја даде на Исак.

Тој го утврди како наредба за Јаков и како вечен завет за Израел,

велејќи: ‚Тебе ќе ти ја дадам Хананската земја како дел од вашето наследство.‘

Тогаш бевте малку на број, само неколкумина и доселеници во неа.

Тие одеа од народ до народ и од едно царство кон друг народ.

Тој не дозволи никој да ги угнетува и заради нив укоруваше цареви:

‚Не допирајте ги Моите помазаници и не правете им зло на Моите пророци.‘

Пеј Му на Господ, цела земјо; од ден на ден објавувајте го Неговото спасение.

Раскажувајте ја Неговата слава меѓу народите и Неговите чудесни дела меѓу сите племиња.

Зашто Господ е велик и достоен за голема пофалба; Тој е пострашен од сите богови.

Сите богови на народите се идоли, а Господ ги создаде небесата.

Слава и величие се пред Него; сила и радост се во Неговото живеалиште.

Оддајте Му на Господ, племиња на народите, оддајте Му на Господ слава и сила.

Оддајте Му ја на Господ славата што Му припаѓа на Неговото име; принесете дар и дојдете пред Него. Поклонете Му се на Господ во светоста на Неговата убавина.

Нека трепери пред Него целата земја! Светот е цврсто утврден и нема да се помести.

Нека се радуваат небесата и нека ликува земјата; нека се зборува меѓу народите: ‚Господ царува!‘

Нека бучи морето и сѐ што е во него; нека се радува полето и сѐ што е на него.

Тогаш шумските дрвја ќе пеат од радост пред Господ, зашто доаѓа да ѝ суди на земјата.

Благодарете Му на Господ, зашто е добар; Неговата милост трае засекогаш.

Кажете: ‚Спаси нѐ, Боже на нашето спасение! Собери нѐ и избави нѐ од народите, за да Му благодариме на Твоето свето име и да се фалиме со Твојата слава.‘

Благословен нека биде Господ, Израелевиот Бог, од вечност до вечност!“ Тогаш целиот народ рече: „Амин!“ и Го пофали Господ.

Давид ги остави таму, пред ковчегот на Господовиот завет, Асаф и неговите браќа, за постојано да служат пред ковчегот, според потребата на секој ден.

Ги остави и Овид-Едом и неговите шеесет и осум браќа. Овид-Едом, синот на Једутун, и Оса беа вратари.

Свештеникот Садок и неговите браќа свештеници ги постави пред Господовото живеалиште на високото место во Гаваон,

за постојано, наутро и навечер, да Му принесуваат на Господ жртви паленици врз жртвеникот за жртви паленици, според сѐ што е напишано во Законот што Господ му го даде на Израел.

Со нив беа Еман, Једутун и другите избрани и по име определени да Му благодарат на Господ, зашто Неговата милост трае засекогаш.

Еман и Једутун имаа труби, кимвали и други инструменти за Божјите песни. Синовите на Једутун беа вратари.

Потоа целиот народ си замина, секој во својот дом, а Давид се врати да го благослови својот дом.