1 Коринтјаните

А за духовните дарови, браќа, не сакам да останете во незнаење.

Знаете дека кога бевте незнабожци, бевте заведувани и водени кон немите идоли.

Затоа ви кажувам: никој што зборува преку Божјиот Дух не вели: „Проклет да е Исус“, и никој не може да каже: „Исус е Господ“, освен преку Светиот Дух.

Има различни дарови, но Духот е ист;

има различни служби, но Господ е ист;

има различни дејства, но Бог е ист, Кој го извршува сето тоа во сите.

А на секого му се дава пројавувањето на Духот за општа корист.

На еден преку Духот му се дава збор на мудрост, а на друг збор на знаење според истиот Дух;

на друг вера преку истиот Дух; на друг дарови на исцелување преку истиот Дух;

на друг – правење чуда; на друг – пророштво; на друг – разликување на духовите; на друг – различни јазици; а на друг – толкување на јазиците.

Но сето тоа го врши еден ист Дух, распределувајќи му на секого поединечно како што сака.

Зашто, како што телото е едно и има многу членови, а сите членови на телото, иако се многу, се едно тело – така е и со Христос.

Зашто сите ние преку еден Дух бевме крстени во едно тело – било Јудејци или Елини, било робови или слободни – и сите бевме напоени со еден Дух.

Зашто телото не се состои од еден член, туку од многу.

Ако ногата рече: „Бидејќи не сум рака, не сум од телото“, зар само заради тоа таа не е од телото?

И ако увото рече: „Бидејќи не сум око, не сум од телото“, зар поради тоа увото не е од телото?

Ако целото тело беше око, каде би бил слухот? Ако целото беше слух, каде би бил мирисот?

Но Бог ги поставил членовите во телото, секој од нив, како што сакал.

Ако сите беа еден член, каде би било телото?

Но сега има многу членови, а едно тело.

Окото не може да ѝ рече на раката: „Не си ми потребна“, ниту главата на нозете: „Не сте ми потребни.“

Напротив, телесните членови што ни изгледаат послаби се неопходни,

а на оние телесни членови што ги сметаме за помалку чесни им укажуваме поголема чест; и нашите непристојни делови ги покриваме со поголема пристојност,

додека нашите пристојни делови немаат потреба од тоа. Но Бог така го составил телото што му дал поголема чест на оној дел што ја немал,

за да нема поделба во телото, туку членовите подеднакво да се грижат еден за друг.

Ако страда еден член, со него страдаат сите членови; ако е прославен еден член, со него се радуваат сите членови.

А вие сте Христовото тело, и секој од вас е Негов член.

И Бог постави некои во црквата: прво апостоли, второ пророци, трето учители, потоа оние што прават чуда, оние што имаат дарови на исцелување, оние што помагаат, оние што управуваат и оние што зборуваат на различни јазици.

Зар сите се апостоли? Зар сите се пророци? Зар сите се учители? Зар сите прават чуда?

Дали сите имаат дарови на исцелување? Дали сите зборуваат на јазици? Дали сите толкуваат?

Но стремете се кон поголемите дарови. А јас ќе ви покажам уште повозвишен пат.