1 Коринтјаните

Кога некој од вас има спор со друг, како се осмелува да се суди пред неправедните, а не пред светите?

Не знаете ли дека светите ќе му судат на светот? А ако светот ќе биде суден од вас, зар не сте способни да пресудувате во најмалите спорови?

Не знаете ли дека ангели ќе судиме? Колку повеќе тогаш можеме да судиме за работите од овој свет?

Кога имате судски спорови за работи од овој живот, зар ги поставувате за судии оние што немаат углед во црквата?

За ваш срам велам: зарем меѓу вас нема ниеден мудар кој може да пресуди меѓу своите браќа?

Туку брат со брат се суди, и тоа пред неверници!

Веќе е целосен пораз за вас тоа што имате судски спорови меѓу себе. Зошто попрво не претрпите неправда? Зошто попрво не ја поднесете штетата?

Но вие самите правите неправда и нанесувате штета, и тоа на своите браќа.

Или не знаете дека неправедните нема да го наследат Божјото царство? Не залажувајте се: ни блудниците, ни идолопоклониците, ни прељубниците, ни мекушците, ни мажите што легнуваат со мажи,

ниту крадците, ниту користољупците, ниту пијаниците, ниту навредувачите, ниту грабачите нема да го наследат Божјото царство.

Такви беа некои од вас; но се измивте, се осветивте и се оправдавте во името на Господ Исус Христос и во Духот на нашиот Бог.

„Сѐ ми е дозволено“, но не е сѐ корисно. „Сѐ ми е дозволено“, но нема да дозволам ништо да завладее со мене.

„Храната е за стомакот, а стомакот за храната“, но Бог ќе ги уништи и едното и другото. Телото не е за блудство, туку за Господ, а Господ за телото.

А Бог Го воскресна Господ и нас ќе нѐ воскресне со Својата сила.

Не знаете ли дека вашите тела се Христови членови? Зар да ги земам Христовите членови и да ги направам членови на блудница? Никако!

Или не знаете дека оној што се соединува со блудница станува едно тело со неа? Зашто е речено: „Двајцата ќе бидат едно тело.“

А оној што се соединува со Господ е еден дух со Него.

Бегајте од блудството! Секој друг грев што го прави човекот е надвор од телото, а блудникот греши против сопственото тело.

Или не знаете дека вашето тело е храм на Светиот Дух, Кој е во вас и Кого Го имате од Бог, и дека не си припаѓате на самите себе?

Зашто скапо сте купени. Затоа прославете Го Бог во своето тело.