1 Самоил

Давид си рече во своето срце: „Еден ден ќе загинам од Сауловата рака. За мене нема ништо подобро отколку да побегнам во филистејската земја. Тогаш Саул ќе престане да ме бара по сите Израелеви предели, и ќе се избавам од неговата рака.“

Тогаш Давид стана и со шестотините мажи што беа со него отиде кај гетскиот цар Анхус, синот на Маох.

Давид живееше кај Анхус во Гет, тој и неговите луѓе, секој со своето семејство. Со Давид беа и неговите две жени: Езраелката Ахиноама и Кармилката Авигеја, Наваловата жена.

Кога му јавија на Саул дека Давид побегнал во Гет, тој повеќе не го бараше.

Давид му рече на Анхус: „Ако најдов наклоност во твоите очи, нека ми дадат место во еден од полските градови, за да живеам таму. Зошто твојот слуга да живее со тебе во царскиот град?“

Тој ден Анхус му го даде Сиклаг. Затоа Сиклаг им припаѓа на Јудините цареви до денес.

Времето што Давид го помина во филистејската земја беше една година и четири месеци.

Давид и неговите луѓе излегуваа и ги напаѓаа Гесурците, Гезерците и Амаличаните, зашто тие од старо време живееја во земјата што се протега кон Сур и до египетската земја.

Давид ја опустошуваше земјата и не оставаше жив ни маж ни жена. Ги земаше овците, воловите, магарињата, камилите и облеката, а потоа се враќаше кај Анхус.

Кога Анхус ќе прашаше: „Каде напаѓавте денес?“ Давид одговараше: „Во јужниот дел на Јуда“, или: „Во јужниот дел на Јерамеелците“, или: „Во јужниот дел на Кенејците.“

Давид не оставаше жив ни маж ни жена за да ги доведе во Гет, мислејќи: „Да не кажат против нас: ‚Така постапуваше Давид.‘“ Таква беше неговата постапка сето време додека живееше во филистејската земја.

Анхус му веруваше на Давид и си велеше: „Тој сигурно му станал омразен на својот народ Израел, па ќе ми биде слуга засекогаш.“