2 Летописи

Кога царството на Ровоам се зацврсти и тој стана силен, го напушти Господовиот закон, а заедно со него и целиот Израел.

Поради нивната неверност кон Господ, во петтата година од царувањето на Ровоам, египетскиот цар Сисак тргна против Ерусалим.

Дојде со илјада и двесте бојни коли, шеесет илјади коњаници и безброен народ што дојде со него од Египет: Либијци, Сукијци и Етиопјани.

Ги освои утврдените градови што му припаѓаа на Јуда и стигна до Ерусалим.

Тогаш пророкот Семај дојде кај Ровоам и кај јудејските водачи, кои поради Сисак се собраа во Ерусалим, и им рече: „Вака вели Господ: ‚Вие Ме напуштивте, па затоа и Јас ве оставив во раката на Сисак.‘“

Тогаш Израелевите водачи и царот се понизија и рекоа: „Господ е праведен.“

Кога Господ виде дека се понизија, Господовиот збор дојде до Семај: „Тие се понизија. Нема да ги уништам, туку наскоро ќе им дадам избавување, и Мојот гнев нема да се излее врз Ерусалим преку Сисак.

Сепак, ќе му станат слуги, за да ја познаат разликата меѓу служењето на Мене и служењето на земните царства.“

Египетскиот цар Сисак тргна против Ерусалим и ги зеде ризниците од Господовиот дом и ризниците од царскиот дворец. Зеде сѐ, па ги зеде и златните штитови што ги направи Соломон.

Наместо нив, царот Ровоам направи бронзени штитови и им ги предаде на заповедниците на телохранителите што го чуваа влезот во царскиот дворец.

Секогаш кога царот влегуваше во Господовиот дом, телохранителите ги носеа штитовите, а потоа ги враќаа во просторијата на телохранителите.

Бидејќи Ровоам се понизи, Господовиот гнев се одврати од него и не го уништи целосно. Освен тоа, во Јуда сѐ уште имаше нешто добро.

Царот Ровоам се зацврсти во Ерусалим и продолжи да царува. Имаше четириесет и една година кога стана цар и царуваше седумнаесет години во Ерусалим, градот што Господ го избра меѓу сите Израелеви племиња за да го постави таму Своето име. Неговата мајка се викаше Наама и беше Амонка.

Тој правеше зло, зашто не го насочи своето срце да Го бара Господ.

Делата на Ровоам, од почетокот до крајот, се запишани во записите на пророкот Семај и на гледачот Идо, во записите за семејното потекло. Меѓу Ровоам и Јеровоам постојано имаше војни.

Потоа Ровоам почина и беше погребан во Давидовиот град. Наместо него се зацари неговиот син Авија.