2 Коринтјаните

А за служењето на светите нема потреба да ви пишувам,

зашто ја знам вашата подготвеност и затоа се фалам со вас пред Македонците дека Ахаја е подготвена уште од минатата година, а вашата ревност ги поттикна мнозина.

Но ги испратив браќата, за нашата пофалба со вас во оваа работа да не биде празна, туку да бидете подготвени како што реков.

Инаку, ако со мене дојдат Македонци и ве најдат неподготвени, ние – да не речам вие – ќе се посрамиме во оваа наша увереност.

Затоа сметав дека е потребно да ги замолам браќата да дојдат кај вас однапред и да го подготват вашиот однапред ветен прилог, за тој да биде подготвен како доброволен дар, а не како изнудување.

А ова ви го велам: кој сее скржаво, скржаво и ќе жнее; а кој сее изобилно, изобилно и ќе жнее.

Секој нека даде како што одлучил во своето срце, не со жал или од принуда, зашто Бог го љуби радосниот дарител.

А Бог може изобилно да ви ја даде секоја благодат, за секогаш, имајќи доволно во сѐ, да изобилувате во секое добро дело.

Како што е напишано: „Раздаде, им даде на сиромасите; неговата праведност останува довека.“

А Оној Кој му дава семе на сејачот и леб за храна, ќе ви даде и ќе го умножи семето и ќе ги зголеми плодовите на вашата праведност.

Така во сѐ ќе се збогатите за секоја дарежливост, која преку нас создава благодарност кон Бог.

Зашто оваа служба не само што ги надополнува потребите на светите, туку и изобилува во многу благодарности кон Бог.

Преку доказот на оваа служба тие Го прославуваат Бог поради послушноста со која го исповедате Христовото Евангелие и поради дарежливоста во заедништвото со нив и со сите.

Кога се молат за вас, тие копнеат по вас поради Божјата преизобилна благодат врз вас.

Му благодариме на Бог за Неговиот неискажлив дар!