2 Коринтјаните

Браќа, сакаме да ве известиме за Божјата благодат дадена на црквите во Македонија:

иако беа тешко искушувани со неволји, нивната голема радост и крајна сиромаштија се излеаја во изобилна дарежливост.

Сведочам дека дадоа според своите можности, па дури и повеќе од своите можности, доброволно,

усрдно нѐ молеа за благодатта и учеството во служењето на светите.

И не само како што се надевавме, туку најнапред Му се предадоа себеси на Господ, а потоа и нам, по Божја волја.

Затоа го замоливме Тит, како што ја започна оваа работа, така и да го доврши меѓу вас и ова дело на благодатта.

А како што изобилувате во сѐ – во вера, збор, знаење, сета ревност и во љубовта што ја разбудивме во вас – така изобилувајте и во оваа благодат.

Не го кажувам ова како заповед, туку преку ревноста на другите ја проверувам искреноста на вашата љубов.

Зашто ја знаете благодатта на нашиот Господ Исус Христос: иако беше богат, заради вас стана сиромашен, за вие преку Неговата сиромаштија да се збогатите.

И во ова ви давам совет: тоа е корисно за вас: вие уште од минатата година први почнавте не само да го правите тоа, туку и да го посакувате.

А сега довршете го делото, за подготвеноста што ја покажавте во желбата да биде проследена и со довршување според она што го имате.

Зашто ако има подготвеност, дарот е прифатлив според она што човек го има, а не според она што го нема.

Не е целта другите да бидат олеснети, а вие оптоварени, туку да има еднаквост.

Во сегашно време вашиот вишок нека ја надополни нивната немаштија, за и нивниот вишок да ја надополни вашата немаштија, за да има еднаквост.

Како што е напишано: „Кој собра многу, немаше вишок; а кој собра малку, немаше недостиг.“

Но Му благодариме на Бог, Кој ја стави истата ревност за вас во срцето на Тит.

Зашто тој ја прими нашата молба, но бидејќи беше многу ревносен, доброволно тргна кај вас.

Со него го испративме и братот, кој е пофален во сите цркви поради Евангелието.

И не само тоа, туку црквите го избраа да патува со нас во ова дело на благодатта со кое служиме за слава на Господ и како доказ за нашата подготвеност.

Така внимаваме никој да не нѐ обвини во врска со овој изобилен дар со кој управуваме.

Зашто се грижиме за она што е чесно не само пред Господ, туку и пред луѓето.

Со нив го испративме и нашиот брат, чија ревност многупати сме ја провериле во многу работи, а сега е уште поревносен поради големата доверба во вас.

Што се однесува до Тит, тој е мој другар и соработник за вас; а нашите браќа се пратеници на црквите и Христова слава.

Затоа покажете им пред црквите доказ за својата љубов и за пофалбата што ја изразивме за вас.