2 Јован

Од старешината до избраната госпоѓа и нејзините деца, кои ги љубам во вистината – и не само јас, туку и сите што ја познаваат вистината –

поради вистината што останува во нас и ќе биде со нас довека.

Благодат, милост и мир од Бог Таткото и од Исус Христос, Синот на Таткото, ќе бидат со нас во вистина и љубов.

Многу се зарадував што меѓу твоите деца најдов такви што живеат во вистината, според заповедта што ја примивме од Таткото.

А сега те молам, госпоѓо – не како да ти пишувам нова заповед, туку онаа што ја имавме од почетокот – да се љубиме еден со друг.

А љубовта е во ова: да живееме според Неговите заповеди. Ова е заповедта што ја чувте од почетокот – да живеете според неа.

Зашто многу измамници излегоа во светот, кои не признаваат дека Исус Христос дојде во тело. Таквиот е измамник и антихрист.

Внимавајте на себе, за да не го изгубите она за што се трудевме, туку да примите целосна награда.

Секој што оди предалеку и не останува во Христовото учење, Го нема Бог. Оној што останува во учењето, Ги има и Таткото и Синот.

Ако некој дојде кај вас и не го носи ова учење, не примајте го во домот и не упатувајте му поздрав,

зашто оној што така го поздравува, учествува во неговите зли дела.

Имам многу да ви пишувам, но не сакав да го правам тоа со хартија и мастило; туку се надевам дека ќе дојдам кај вас и ќе разговараме лице в лице, за нашата радост да биде целосна.

Те поздравуваат децата на твојата избрана сестра.