2 Самоил

По некое време умре царот на Амонците, а неговиот син Анун стана цар наместо него.

Тогаш Давид рече: „Ќе му покажам милост на Анун, синот на Наас, како што неговиот татко ми покажа милост мене.“ Затоа Давид испрати свои слуги да го утешат поради смртта на неговиот татко. Кога Давидовите слуги стигнаа во земјата на Амонците,

амонските владетели му рекоа на својот господар Анун: „Мислиш ли дека Давид го почитува твојот татко затоа што ти испратил утешители? Зар неговите слуги не дојдоа кај тебе за да го извидат и разгледаат градот, па потоа да го разурнат?“

Тогаш Анун ги фати Давидовите слуги, им избричи половина од брадите и им ја пресече облеката до половина, до задникот, па ги отпушти.

Кога му кажаа на Давид, тој испрати луѓе да ги пресретнат, зашто мажите беа многу засрамени. Царот им порача: „Останете во Ерихон додека не ви пораснат брадите, па потоа вратете се.“

Кога Амонците видоа дека станале омразени кај Давид, испратија и најмија дваесет илјади пешаци од Сиријците од Вет-Реов и Сова, илјада мажи од царот на Мааха и дванаесет илјади мажи од Тов.

Кога Давид го слушна тоа, ги испрати Јоав и целата војска на храбрите мажи.

Амонците излегоа и се наредија за битка кај влезот на градската порта, а Сиријците од Сова и Реов и мажите од Тов и Мааха беа одделно во полето.

Кога Јоав виде дека борбените редови се поставени против него и од предната и од задната страна, избра дел од најдобрите Израелеви мажи и ги нареди против Сиријците.

Остатокот од народот му го предаде на својот брат Ависај, кој ги нареди против Амонците.

Јоав рече: „Ако Сиријците бидат посилни од мене, ти ќе ми дојдеш на помош; а ако Амонците бидат посилни од тебе, јас ќе ти дојдам на помош.

Биди храбар! Да се бориме храбро за својот народ и за градовите на нашиот Бог, а Господ нека го направи она што е добро во Неговите очи.“

Тогаш Јоав и народот што беше со него тргнаа во битка против Сиријците, и тие побегнаа пред него.

Кога Амонците видоа дека Сиријците бегаат, и тие побегнаа пред Ависај и влегоа во градот. Потоа Јоав се повлече од Амонците и се врати во Ерусалим.

Кога Сиријците видоа дека Израел ги поразил, повторно се собраа заедно.

Ададезер испрати да ги доведат Сиријците што беа од другата страна на реката. Тие дојдоа во Елам, предводени од Совак, заповедникот на војската на Ададезер.

Кога му беше јавено на Давид, тој го собра целиот Израел, го премина Јордан и дојде во Елам. Сиријците се наредија против Давид и се бореа со него.

Но Сиријците побегнаа пред Израел. Давид уби од Сиријците седумстотини возачи на бојни коли и четириесет илјади коњаници. Го порази и нивниот војсководец Совак, и тој умре таму.

Кога сите цареви што му беа потчинети на Ададезер видоа дека Израел ги поразил, склучија мир со Израел и му се потчинија. Оттогаш Сиријците се плашеа повторно да им помагаат на Амонците.