5 Мојсеева — Второзаконие

Кога ќе влезеш во земјата што Господ, твојот Бог, ти ја дава во наследство, ќе ја завладееш и ќе се населиш во неа,

земи од првите плодови на сѐ што ќе роди земјата што Господ, твојот Бог, ти ја дава, стави ги во кошница и оди на местото што Господ, твојот Бог, ќе го избере за таму да го насели Своето име.

Оди кај свештеникот што ќе служи во тоа време и кажи му: „Денес Му изјавувам на Господ, твојот Бог, дека влегов во земјата за која Господ им се заколна на нашите татковци дека ќе ни ја даде.“

Тогаш свештеникот нека ја земе кошницата од твојата рака и нека ја постави пред жртвеникот на Господ, твојот Бог.

А ти изјави пред Господ, својот Бог: „Мојот прататко беше скитник Арамеец. Тој слезе во Египет со малкумина луѓе и престојуваше таму, а таму стана голем, силен и многуброен народ.

Египќаните постапуваа сурово со нас, нѐ угнетуваа и ни наложија тешка работа.

Тогаш извикавме кон Господ, Бог на нашите татковци, и Господ го чу нашиот глас и ги виде нашата мака, нашиот труд и нашето угнетување.

Господ нѐ изведе од Египет со силна рака и подигната десна рака, со голем страв, со знаци и чуда.

Нѐ доведе на ова место и ни ја даде оваа земја, земја во која течат млеко и мед.

И сега, еве, ги донесов првите плодови од земјата што Ти ми ја даде, Господи.“ Постави ги пред Господ, својот Бог, и поклони се пред Господ, својот Бог.

Радувај се на секое добро што Господ, твојот Бог, ти го дал тебе и на твојот дом, заедно со Левитот и туѓинецот што живее меѓу вас.

Кога во третата година, годината на десетокот, ќе завршиш со одделувањето на целиот десеток од својот род, и ќе им го дадеш на Левитот, туѓинецот, сирачето и вдовицата, за да јадат во твоите градови и да се наситат,

тогаш кажи пред Господ, својот Бог: „Го изнесов од својот дом она што е посветено и им го дадов на Левитот, туѓинецот, сирачето и вдовицата, според сите Твои заповеди што ми ги даде. Не прекршив ниту заборавив некоја од Твоите заповеди.

Не јадев од десетокот додека тагував, не отстранив ништо од него додека бев нечист и не дадов ништо од него за мртовец. Го послушав гласот на Господ, својот Бог, и направив сѐ како што ми заповеда.

Погледни од Своето свето живеалиште, од небото, и благослови го Својот народ Израел и земјата што ни ја даде, како што им се заколна на нашите татковци – земја во која течат млеко и мед.“

Денес Господ, твојот Бог, ти заповеда да ги исполнуваш овие одредби и закони. Пази ги и исполнувај ги со целото свое срце и со целата своја душа.

Денес изјави дека Господ е твој Бог и дека ќе одиш по Неговите патишта, ќе ги пазиш Неговите одредби, Неговите заповеди и Неговите закони и ќе го слушаш Неговиот глас.

А Господ денес изјави дека ќе бидеш Негов сопствен народ, како што ти вети, и дека ќе ги пазиш сите Негови заповеди.

Тој ќе те постави повисоко од сите народи што ги создал – за пофалба, име и слава – и ќе бидеш свет народ на Господ, твојот Бог, како што рече.