Ефесјаните

Поради тоа јас, Павле, сум затвореник на Христос Исус заради вас, незнабожците.

Секако сте слушнале за службата на Божјата благодат што ми беше доверена заради вас:

преку откровение ми беше откриена тајната, за која накратко ви напишав претходно.

Кога ќе го прочитате тоа, можете да разберете какво сознание имам за Христовата тајна.

Во претходните поколенија таа не им беше откриена на луѓето како што сега, преку Духот, им е откриена на Неговите свети апостоли и пророци:

преку Евангелието незнабожците се сонаследници, делови на истото тело и соучесници во ветувањето во Христос Исус.

На тоа Евангелие му станав служител според дарот на Божјата благодат, која ми беше дадена преку дејствувањето на Неговата сила.

Мене, најмалиот од сите свети, ми беше дадена оваа благодат: да им го проповедам на незнабожците Евангелието за неистражливото Христово богатство

и на сите да им покажам како се остварува тајната што од вечноста беше скриена во Бог, Кој создаде сè.

Така сега, преку црквата, на владетелствата и властите во небесните места им се открива многустраната Божја мудрост.

Тоа е според вечната намера што Бог ја оствари во Исус Христос, нашиот Господ.

Во Него, преку верата во Него, имаме смелост и пристап до Бог со увереност.

Затоа ве молам да не се обесхрабрувате поради неволјите што ги трпам заради вас; тие се ваша слава.

Поради тоа ги свиткувам своите колена пред Таткото,

од Кого секое семејство на небото и на земјата го добива своето име.

Се молам, според богатството на Својата слава, преку Својот Дух силно да ве зацврсти во вашата внатрешна личност,

и Христос преку верата да живее во вашите срца. Вкоренети и втемелени во љубовта,

да можете заедно со сите свети да разберете колкави се ширината, должината, височината и длабочината

и да ја познаете Христовата љубов, која го надминува секое знаење, за да бидете исполнети со целата Божја полнота.

А на Оној Кој, според силата што дејствува во нас, може да направи неизмерно повеќе од сè што бараме или можеме да замислиме –

Нему нека Му биде славата во црквата и во Исус Христос низ сите поколенија, во сите векови. Амин.