2 Мојсеева — Излез

Глава 1

1
Ова се имињата на Израелевите синови што дојдоа со Јаков во Египет; секој дојде со своето семејство:
2
Рувим, Симеон, Леви и Јуда,
3
Исахар, Завулон и Венијамин,
4
Дан, Нефталим, Гад и Асир.
5
Сите што потекнуваа од Јаков беа седумдесет души; а Јосиф веќе беше во Египет.
6
Јосиф умре, како и сите негови браќа и целото тоа поколение.
7
Но Израелевите потомци беа плодни, многу се размножија, се намножија и станаа мошне силни, така што земјата се исполни со нив.
8
Тогаш над Египет дојде на власт нов цар, кој не знаеше за Јосиф.
9
Тој му рече на својот народ: „Ете, народот на Израелевите синови е поброен и посилен од нас.
10
Ајде да постапиме мудро со нив, за да не се размножуваат уште повеќе. Инаку, ако настане војна, ќе им се придружат на нашите непријатели, ќе војуваат против нас и ќе си заминат од земјата.“
11
Затоа поставија над нив надзорници за присилна работа, за да ги измачуваат со тешки товари. Тие му ги изградија на фараонот градовите-складишта Питом и Рамесес.
12
Но колку повеќе ги угнетуваа, толку повеќе тие се размножуваа и се ширеа, па Египќаните се плашеа од Израелевите синови.
13
Затоа Египќаните сурово ги принудуваа Израелевите синови да работат.
14
Им го загорчуваа животот со тешка работа: правење малтер и тули и секаква полска работа. Во секоја работа сурово ги угнетуваа.
15
Потоа египетскиот цар им рече на еврејските бабици, од кои едната се викаше Шифра, а другата Фуа:
16
„Кога им помагате на Еврејките при породување и ќе видите што родиле, ако е син - убијте го, а ако е ќерка - нека живее.“
17
Но бабиците се плашеа од Бог и не го правеа она што им го заповеда египетскиот цар, туку ги оставаа машките деца живи.
18
Тогаш египетскиот цар ги повика бабиците и ги праша: „Зошто го правите ова и ги оставате машките деца живи?“
19
Бабиците му одговорија на фараонот: „Еврејките не се како Египќанките; тие се силни и се породуваат пред да дојде бабицата кај нив.“
20
Затоа Бог им правеше добро на бабиците, а народот се размножуваше и стануваше мошне силен.
21
И бидејќи бабиците се плашеа од Бог, Тој им даде семејства.
22
Тогаш фараонот му заповеда на целиот свој народ: „Секое машко дете што ќе се роди фрлете го во Нил, а секое женско дете оставете го живо.“