Езекиел

Тој ми рече: „Сине човечки, застани на своите нозе и ќе зборувам со тебе.“

Додека ми зборуваше, Духот влезе во мене и ме постави на нозе. Тогаш Го слушнав Оној што ми зборуваше.

Ми рече: „Сине човечки, те испраќам кај синовите Израелеви, кај бунтовен народ што се побуни против Мене. И тие и нивните татковци Ми грешеа сѐ до денес.

Луѓето кај кои те испраќам се дрски и тврдоглави. Кажи им: ‚Вака вели Господ Бог.‘

Без разлика дали ќе послушаат или ќе одбијат — зашто тие се бунтовен дом — ќе знаат дека меѓу нив имало пророк.

А ти, сине човечки, не плаши се од нив и не плаши се од нивните зборови, иако околу тебе има трње и боцки и живееш меѓу скорпии. Не плаши се од нивните зборови и не ужаснувај се од нивните лица, зашто тие се бунтовен дом.

Кажувај им ги Моите зборови, без разлика дали ќе слушаат или ќе одбијат, зашто тие се бунтовни.

Но ти, сине човечки, слушај што ти зборувам. Не биди бунтовен како овој бунтовен дом. Отвори ја устата и изеди го она што ти го давам.“

Погледнав и ете, кон мене беше испружена рака, а во неа имаше свиток.

Го рашири пред мене. Беше испишан и од предната и од задната страна, а на него беа напишани тажачки песни, лелекања и несреќи.