Езекиел

Господовиот збор дојде до мене:

„Сине човечки, пророкувај и кажи: ‚Вака вели Господ Бог: Лелекајте: Тешко на тој ден!

Зашто денот е близу; близу е Господовиот ден — ден на облаци, време на суд над народите.

Меч ќе дојде против Египет и трепет ќе го зафати Куш кога убиените ќе паѓаат во Египет. Ќе му го однесат богатството и неговите темели ќе бидат урнати.

Куш, Пут, Луд, сите мешани народи, Кув и синовите на сојузничката земја ќе паднат со нив од меч.‘

Вака вели Господ: ‚Ќе паднат оние што го поддржуваат Египет и ќе биде понижена гордоста на неговата сила. Од Мигдол до Сиена ќе паѓаат во него од меч‘“, вели Господ Бог.

„Ќе бидат опустошени меѓу опустошените земји, а нивните градови ќе бидат меѓу разурнатите градови.

Тогаш ќе знаат дека Јас сум Господ, кога ќе запалам оган во Египет и ќе бидат скршени сите негови помошници.

Во тој ден гласници ќе излезат од Мене со бродови за да го исплашат безгрижниот Куш. Трепет ќе ги зафати во денот на Египет, зашто ете, тој ден доаѓа.“

Вака вели Господ Бог: „Ќе му ставам крај на мноштвото Египетско преку раката на Навуходоносор, царот на Вавилон.

Тој и неговиот народ со него — најсуровите меѓу народите — ќе бидат доведени да ја уништат земјата. Ќе ги извадат своите мечеви против Египет и ќе ја наполнат земјата со убиени.

Ќе ги исушам реките и ќе ја предадам земјата во рацете на зли луѓе. Преку рацете на туѓинци ќе ја опустошам земјата и сѐ што е во неа. Јас, Господ, зборував.“

Вака вели Господ Бог: „Ќе ги уништам идолите и ќе им ставам крај на лажните богови во Ноф. Повеќе нема да има владетел од египетската земја и ќе внесам страв во Египет.

Ќе го опустошам Патрос, ќе запалам оган во Цоан и ќе извршам пресуди во Но.

Ќе ја излеам Својата лутина врз Син, тврдината на Египет, и ќе го истребам мноштвото во Но.

Ќе запалам оган во Египет. Син ќе се превива од болка, Но ќе биде пробиен, а Ноф ќе биде напаѓан среде бел ден.

Младичите на Авен и Пи-Бесет ќе паднат од меч, а нивните жители ќе заминат во заробеништво.

Во Тахпанхес денот ќе потемни кога таму ќе ги скршам јаремите на Египет и ќе престане гордоста на неговата сила. Облак ќе го покрие градот, а неговите населби ќе заминат во заробеништво.

Така ќе извршам пресуди над Египет и ќе знаат дека Јас сум Господ.“

Во единаесеттата година, во првиот месец, на седмиот ден од месецот, Господовиот збор дојде до мене:

„Сине човечки, ја скршив раката на фараонот, царот на Египет. Ете, не е преврзана за да оздрави, не е ставен завој за да зајакне и повторно да може да држи меч.

Затоа вака вели Господ Бог: ‚Ете, Јас сум против фараонот, царот на Египет. Ќе му ги скршам двете раце — и здравата и веќе скршената — и мечот ќе му падне од раката.

Ќе ги расеам Египќаните меѓу народите и ќе ги растурам по земјите.

Ќе ги зајакнам рацете на вавилонскиот цар и ќе го ставам Својот меч во неговата рака. А рацете на фараонот ќе ги скршам и тој ќе офка пред него како смртно ранет човек.

Ќе ги зајакнам рацете на вавилонскиот цар, а рацете на фараонот ќе паднат. Тогаш ќе знаат дека Јас сум Господ, кога ќе го ставам Својот меч во раката на вавилонскиот цар и тој ќе го испружи против египетската земја.

Ќе ги расеам Египќаните меѓу народите и ќе ги растурам по земјите. Тогаш ќе знаат дека Јас сум Господ.‘“