Езекиел

„А ти, сине човечки, земи остар меч и употреби го како берберски брич. Помини со него преку својата глава и брада. Потоа земи вага, измери ја косата и подели ја.

Една третина изгори ја во оган среде градот кога ќе завршат деновите на опсадата. Втората третина земи ја и сечи ја со меч околу градот. Последната третина расеј ја на ветерот, а Јас ќе извлечам меч по нив.

Од неа земи мал број влакна и завиткај ги во краевите на својата облека.

Потоа земи уште неколку од нив, фрли ги во огнот и изгори ги. Од нив ќе излезе оган против целиот дом Израелев.“

Вака вели Господ Бог: „Ова е Ерусалим. Го поставив среде народите, а земјите се насекаде околу него.

Но тој злобно се побуни против Моите прописи повеќе од народите и против Моите одредби повеќе од земјите околу него. Ги отфрлија Моите прописи и не одеа според Моите одредби.

Затоа вака вели Господ Бог: ‚Бидејќи бевте побунтовни од народите околу вас, не одевте според Моите одредби, не ги исполнувавте Моите прописи, па дури не живеевте ни според правилата на народите околу вас,

затоа вака вели Господ Бог: Ете, и Јас сум против тебе! Среде тебе ќе извршам пресуди пред очите на народите.

Поради сите твои одвратности ќе направам со тебе нешто какво што досега не сум направил и какво повеќе нема да направам.

Затоа татковците среде тебе ќе ги јадат своите синови, а синовите ќе ги јадат своите татковци. Ќе извршам пресуди над тебе и целиот твој остаток ќе го расеам на сите ветрови.

Затоа, жив сум Јас‘, вели Господ Бог, ‚бидејќи го оскверни Моето светилиште со сите свои одвратни идоли и со сите свои одвратности, и Јас ќе те намалам. Моето око нема да те поштеди и нема да покажам сожалување.

Една третина од тебе ќе умре од помор и ќе биде уништена од глад среде тебе; една третина ќе падне од меч околу тебе; а една третина ќе ја расеам на сите ветрови и ќе извлечам меч по нив.

Така Мојот гнев ќе се исполни. Ќе ја излеам Својата лутина врз нив и ќе се смирам. Тогаш ќе знаат дека Јас, Господ, зборував во Својата ревност, кога целосно ќе ја излеам Својата лутина врз нив.

Ќе те претворам во пустош и предмет на срам меѓу народите околу тебе, пред очите на секој што ќе помине.

Ќе станеш предмет на срам и потсмев, предупредување и ужас за народите околу тебе, кога ќе извршам пресуди над тебе во гнев, лутина и жестоки казни. Јас, Господ, зборував.

Кога ќе ги испратам врз вас смртоносните стрели на гладот, кои носат уништување и кои ќе ги испратам за да ве уништам, ќе го засилам гладот против вас и ќе го прекинам вашето снабдување со леб.

Ќе испратам врз вас глад и диви ѕверови што ќе ве остават без деца. Помор и крвопролевање ќе поминат низ тебе, а ќе донесам и меч против тебе. Јас, Господ, зборував.“