1 Мојсеева — Битие

Господ му рече на Аврам: „Излези од својата земја, од својот род и од домот на својот татко, и оди во земјата што ќе ти ја покажам.

Ќе направам од тебе голем народ, ќе те благословам, ќе го прославам твоето име и ти ќе бидеш благослов.

Ќе ги благословам оние што те благословуваат, а ќе го проколнам оној што те проколнува; и преку тебе ќе бидат благословени сите народи на земјата.“

Така Аврам тргна, како што му рече Господ, а Лот тргна со него. Аврам имаше седумдесет и пет години кога излезе од Харан.

Аврам ги зеде својата жена Сарај, својот внук Лот, сиот имот што го беа стекнале и луѓето што ги беа придобиле во Харан. Тргнаа кон Хананската земја и стигнаа во неа.

Аврам ја помина земјата до местото Шехем, до дабот Мор. Во тоа време Хананците живееја во земјата.

Тогаш Господ му се јави на Аврам и рече: „На твоето потомство ќе му ја дадам оваа земја.“ И таму Аврам Му изгради жртвеник на Господ, Кој му се јави.

Оттаму се премести кон ридот источно од Ветил и го распна својот шатор, така што Ветил му беше на запад, а Гај на исток. Таму Му изгради жртвеник на Господ и го повика Господовото име.

Потоа Аврам продолжи да патува кон југ.

Во земјата настана глад, па Аврам слезе во Египет за привремено да живее таму, зашто гладот во Хананската земја беше тежок.

Кога се приближи до Египет, ѝ рече на својата жена Сарај: „Знам дека си убава жена.

Кога Египќаните ќе те видат, ќе речат: ‚Таа му е жена‘, па мене ќе ме убијат, а тебе ќе те остават жива.

Затоа кажи дека си ми сестра, за да ми биде добро поради тебе и да ми го поштедат животот.“

Кога Аврам влезе во Египет, Египќаните видоа дека жената е многу убава.

Ја видоа и фараоновите службеници и ја пофалија пред фараонот; па жената беше одведена во фараоновиот дом.

Поради неа фараонот постапуваше добро со Аврам, и тој доби овци, говеда, магариња, слуги, слугинки, магарици и камили.

Но Господ го удри фараонот и неговиот дом со тешки неволји поради Сарај, Аврамовата жена.

Тогаш фараонот го повика Аврам и му рече: „Што ми направи? Зошто не ми кажа дека таа ти е жена?

Зошто рече: ‚Таа ми е сестра‘, па јас ја зедов за жена? Еве ти ја жената; земи ја и оди си!“

Фараонот им нареди на своите луѓе да го испратат Аврам, заедно со неговата жена и со сѐ што имаше.