1 Мојсеева — Битие

Сара живееше сто дваесет и седум години; тоа беа годините на нејзиниот живот.

Сара умре во Киријат-Арба, односно Хеврон, во Хананската земја. Авраам дојде да тагува за Сара и да ја оплаче.

Потоа Авраам стана од покрај својата покојна жена и им рече на Хетејците:

„Јас сум туѓинец и доселеник меѓу вас. Дајте ми сопствено место за гробница меѓу вас, за да ја погребам својата покојна жена.“

Хетејците му одговорија на Авраам:

„Послушај нѐ, господару. Ти си Божји владетел меѓу нас. Погребај ја својата покојна жена во најдобрата од нашите гробници; никој од нас нема да ти ја одбие својата гробница.“

Тогаш Авраам стана и му се поклони на народот на земјата, на Хетејците.

Им рече: „Ако се согласувате да ја погребам својата покојна жена, послушајте ме и замолете го за мене Ефрон, синот на Сохар,

да ми ја даде пештерата Махпела, која е на крајот од неговата нива. Нека ми ја продаде пред вас за полна цена, за да ја имам како сопствено место за гробница.“

Ефрон седеше меѓу Хетејците. Тој му одговори на Авраам пред сите Хетејци што влегуваа низ портата на неговиот град:

„Не, господару, послушај ме. Ти ја давам нивата, а ти ја давам и пештерата што е во неа. Пред очите на синовите на мојот народ ти ја давам; погребај ја својата покојна жена.“

Авраам повторно му се поклони на народот на земјата.

Потоа му рече на Ефрон пред народот: „Те молам, послушај ме. Ќе ја платам цената на нивата; прими ја од мене, па таму ќе ја погребам својата покојна жена.“

Ефрон му одговори на Авраам:

„Господару, послушај ме. Земјата вреди четиристотини сребрени сикли. Што е тоа меѓу мене и тебе? Погребај ја својата покојна жена.“

Авраам го послуша Ефрон и му измери сребро според сумата што ја кажа пред Хетејците: четиристотини сребрени сикли според мерката што се употребуваше меѓу трговците.

Така нивата на Ефрон во Махпела, спроти Мамре, нивата, пештерата во неа и сите дрвја во границите на нивата,

преминаа во сопственост на Авраам пред очите на Хетејците и на сите што влегуваа низ портата на градот.

Потоа Авраам ја погреба својата жена Сара во пештерата на нивата Махпела, спроти Мамре, односно Хеврон, во Хананската земја.

Така нивата и пештерата во неа му беа потврдени на Авраам како сопствено место за гробница од Хетејците.