Исаија

Во тој ден ќе речеш: „Ќе Те славам, Господи! Иако се разгневи на мене, Твојот гнев се одврати и Ти ме утеши.

Ете, Бог е моето спасение! Ќе се надевам и нема да се плашам, зашто Господ е мојата сила и мојата песна; Тој стана мое спасение.“

Со радост ќе црпите вода од изворите на спасението.

Во тој ден ќе речете: „Славете Го Господ и повикувајте го Неговото име! Објавувајте ги Неговите дела меѓу народите и разгласувајте дека Неговото име е возвишено.

Пејте Му на Господ, зашто направи величествени дела; нека се знае тоа по целата земја.

Воскликни и радувај се, жителке сионска, зашто голем е среде тебе Светиот на Израел!“