Исаија

Пророштво за Египет: Ете, Господ јава на брз облак и доаѓа во Египет. Египетските идоли ќе затреперат пред Него, а срцето на Египет ќе се стопи во него.

„Ќе ги кренам Египќаните едни против други; брат ќе се бори против брат, човек против својот ближен, град против град и царство против царство.

Духот на Египет ќе се обесхрабри во него, а Јас ќе го поматам неговиот совет. Тогаш ќе ги бараат идолите, бајачите, повикувачите на духови и гатачите.

Ќе го предадам Египет во рацете на суров владетел и жесток цар ќе владее над нив“, вели Господ над војските.

Водите на морето ќе пресушат, а Нил ќе се исуши и ќе остане без вода.

Речните ракави ќе засмрдат, египетските канали ќе се намалат и ќе пресушат; трската и рогозот ќе овенат.

Растенијата покрај Нил, крај неговите брегови, и сѐ што е посеано покрај Нил ќе се исуши, ќе биде разнесено и ќе исчезне.

Рибарите ќе тагуваат; ќе жалат сите што фрлаат јадици во Нил, а оние што распнуваат мрежи по водата ќе изнемоштат.

Ќе се засрамат оние што обработуваат исчешлан лен и оние што ткаат бело платно.

Неговите темели ќе бидат скршени и сите што работат за плата ќе бидат ожалостени.

Навистина, водачите на Цоан се безумни! Советите на најмудрите советници на фараонот станаа бесмислени. Како можете да му велите на фараонот: „Јас сум син на мудрите, потомок на древните цареви“?

Каде се сега твоите мудреци? Нека ти кажат и нека дознаат што определил Господ над војските за Египет.

Водачите на Цоан станаа безумни, водачите на Ноф се измамени; оние што требаше да бидат темел на неговите племиња го заведоа Египет.

Господ излеа меѓу нив дух на заблуда, и тие го наведоа Египет да талка во сите свои дела како пијан човек што се тетерави во својата повраќаница.

Во Египет нема да има никакво дело што ќе можат да го направат ни главата ни опашката, ни палмовата гранка ни трската.

Во тој ден Египќаните ќе бидат како уплашени жени; ќе треперат и ќе се плашат пред замавот на раката на Господ над војските, која Тој ја крева над нив.

Земјата Јудина ќе стане ужас за Египет; секој што ќе ја спомне ќе предизвика страв поради намерата што Господ над војските ја определил против него.

Во тој ден во египетската земја ќе има пет града што ќе зборуваат на јазикот на Канаан и ќе се заколнуваат во Господ над војските. Еден од нив ќе се нарекува Град на уништувањето.

Во тој ден ќе има жртвеник за Господ среде египетската земја и столб за Господ покрај нејзината граница.

Тоа ќе биде знак и сведоштво за Господ над војските во египетската земја. Кога ќе повикаат кон Господ поради своите угнетувачи, Тој ќе им испрати спасител и заштитник, и ќе ги избави.

Господ ќе им се открие на Египќаните и Египќаните ќе Го познаат Господ во тој ден. Ќе Му служат со жртви и приноси, ќе Му даваат завети на Господ и ќе ги исполнуваат.

Господ ќе го удри Египет — ќе го удри, но и ќе го исцели. Тие ќе се вратат кон Господ, Тој ќе ги чуе нивните молитви и ќе ги исцели.

Во тој ден ќе има пат од Египет до Асирија. Асирците ќе одат во Египет, а Египќаните во Асирија, и Египќаните заедно со Асирците ќе Му служат на Бог.

Во тој ден Израел ќе биде трет со Египет и Асирија — благослов среде земјата.

Господ над војските ќе ги благослови и ќе рече: „Благословен да е Египет, Мојот народ, Асирија, дело на Моите раце, и Израел, Моето наследство.“