Јаков

Браќа мои, имајте вера во нашиот славен Господ Исус Христос и не бидете пристрасни!

Зашто ако на вашиот собир дојде човек со златен прстен и со убава облека, а влезе и сиромав во валкана облека,

и му укажете посебно внимание на оној во убавата облека и му речете: „Ти седни тука на добро место“, а на сиромашниот му речете: „Ти стој таму“ или: „Седни тука под моето подножје“,

не правите ли разлики меѓу себе и така станувате судии со зли мисли?

Послушајте, мили мои браќа: не ги избра ли Бог оние што се сиромашни во очите на светот да бидат богати во верата и наследници на Царството што им го вети на оние што Го љубат?

А вие го пониживте сиромашниот! Зар богатите не се тие што ве угнетуваат и ве влечат на суд?

Не го хулат ли тие чесното име со кое сте наречени?

Ако пак го исполнувате царскиот закон, според Писмото: „Љуби го својот ближен како самиот себе!“ – добро правите.

Но ако сте пристрасни, правите грев и законот ве осудува како престапници.

Зашто оној што го запазува целиот закон, а се сопне само во едно, станува виновен за сѐ.

Зашто Оној Кој рекол: „Не врши прељуба!“ рекол и: „Не убивај!“ Ако не вршиш прељуба, а убиеш, стануваш престапник на законот.

Така зборувајте и така постапувајте како луѓе кои ќе бидат судени според законот на слободата.

Зашто судот ќе биде без милост кон оној што не покажал милост. Милоста победува над судот.

Каква е ползата, браќа мои, ако некој рече дека има вера, а нема дела? Може ли таквата вера да го спаси?

Ако некој брат или некоја сестра се без облека и имаат потреба од секојдневна храна,

па некој од вас им рече: „Одете си во мир, стоплете се и наситете се!“, а не им го даде она што им е потребно за телото, каква е ползата од тоа?

Така е и со верата: ако нема дела, мртва е сама по себе.

Но некој ќе рече: „Ти имаш вера, а јас имам дела.“ Покажи ми ја својата вера без дела, а јас преку своите дела ќе ти ја покажам мојата вера.

Ти веруваш дека има само еден Бог. Добро правиш! И демоните веруваат и треперат.

Сакаш ли да разбереш, празноглав човеку, дека верата без дела е бесплодна?

Нашиот татко Авраам не беше ли оправдан преку делата кога го принесе својот син Исак на жртвеникот?

Гледаш дека верата соработуваше со неговите дела, и преку делата верата стана совршена,

и така се исполни Писмото, кое вели: „Авраам Му поверува на Бог, и тоа му се припиша за праведност, и беше наречен Божји пријател.“

Гледате дека човек се оправдува преку дела, а не само преку вера.

Исто така и блудницата Раав, не се оправда ли преку дела, кога ги прими гласниците и ги испрати по друг пат?

Зашто, како што телото без дух е мртво, така и верата без дела е мртва.