Јован

[Подоцнежна текстуална варијанта: А Исус отиде во Елеонската гора.]

[Подоцнежна текстуална варијанта: Утредента пак дојде во храмот и сиот народ доаѓаше кај Него. А Тој седна и ги поучуваше.]

[Подоцнежна текстуална варијанта: Тогаш учителите на Законот и фарисеите доведоа кај Него една жена, фатена во прељуба; ја поставија среде сите,]

[Подоцнежна текстуална варијанта: Му рекоа: „Учителе, оваа жена беше фатена во прељуба.]

[Подоцнежна текстуална варијанта: А Мојсеј во Законот ни заповеда: таквите да ги каменуваме; Ти, пак, што велиш?“]

[Подоцнежна текстуална варијанта: Ова го кажуваа за да Го искушаат и да имаат за што да Го обвинат. Но Исус се наведна и со прст пишуваше по земјата.]

[Подоцнежна текстуална варијанта: Но кога продолжија да Го запрашуваат, Тој се исправи и им рече: „Кој од вас е без грев, нека прв фрли камен на неа!“]

[Подоцнежна текстуална варијанта: И пак се наведна долу и пишуваше по земјата.]

[Подоцнежна текстуална варијанта: Кога го чуја тоа, почнаа да си заминуваат еден по еден, почнувајќи од постарите. Исус остана Сам, а жената стоеше среде.]

[Подоцнежна текстуална варијанта: Исус се исправи и ѝ рече: „Жено, каде се? Никој ли не те осуди?“]

[Подоцнежна текстуална варијанта: Таа рече: „Никој, Господи.“ Исус ѝ рече: „Ни Јас не те осудувам. Оди и отсега не греши повеќе.“]

Исус повторно им рече: „Јас сум Светлината на светот. Кој оди по Мене нема да оди во темнина, туку ќе ја има светлината на животот.“

Тогаш Му рекоа фарисеите: „Ти сведочиш Сам за Себе; Твоето сведоштво не е вистинско.“

Исус им одговори и рече: „Макар што сведочам Сам за Себе, Моето сведоштво е вистинско, зашто знам од каде сум дошол и накаде одам; а вие не знаете од каде доаѓам ниту каде одам.

Вие судите по телото, Јас не судам никому.

А и кога судам, Мојот суд е вистински, зашто не сум Сам, туку Јас и Таткото, Кој Ме прати.

А во вашиот Закон е напишано дека сведоштвото на двајца луѓе е вистинско.

Јас сум Оној што сведочи за Себе, и Таткото, Кој Ме прати, сведочи за Мене.“

Тогаш Му рекоа: „Каде е Твојот Татко?“ Исус одговори: „Не Ме познавате ни Мене ни Мојот Татко. Ако Ме познававте Мене, ќе Го познававте и Мојот Татко.“

Овие зборови ги кажа Исус кај ризницата, кога поучуваше во храмот; и никој не Го фати, зашто уште не беше дошол Неговиот час.

Пак им рече Исус: „Јас си одам и ќе Ме барате, и во својот грев ќе умрете. Каде што одам Јас, вие не можете да дојдете.“

Тогаш Јудејците рекоа: „Да не сака да се самоубие и затоа вели: ‚Каде што одам Јас, вие не можете да дојдете?‘“

И им рече: „Вие сте одоздола, а Јас сум одозгора; вие сте од овој свет, а Јас не сум од овој свет.

Затоа ви реков дека ќе умрете во своите гревови; зашто, ако не поверувате дека Јас Сум, ќе умрете во своите гревови.“

Тогаш Му рекоа: „Кој си Ти?“ Исус им рече: „Она што ви го кажувам од почетокот.

Многу имам за вас да зборувам и да судам; но Оној што Ме прати е вистински и она што сум чул од Него, тоа му го кажувам на светот.“

Но не разбраа дека им говореше за Таткото.

А Исус им рече: „Кога ќе Го издигнете Човечкиот Син, тогаш ќе дознаете дека Јас Сум и дека ништо не правам Сам од Себе, туку, како што Ме научи Мојот Татко, така и зборувам.

Оној Кој Ме испрати е со Мене; не Ме остави Сам, зашто секогаш го вршам она што Му е угодно.“

Кога Тој го зборуваше ова, мнозина поверуваа во Него.

Тогаш Исус им рече на Јудејците што поверуваа во Него: „Ако останете во Мојот збор, навистина сте Мои ученици;

И ќе ја познаете вистината, и вистината ќе ве ослободи.“

Му одговорија и рекоа: „Ние сме Авраамово потомство и никогаш никому не сме робувале; а како Ти велиш: ‚Ќе бидете слободни!‘“

Исус им одговори: „Вистина, вистина ви велам: секој што прави грев, роб е на гревот.

А робот не останува вечно дома; Синот останува вечно.

И така, ако Синот ве ослободи, навистина ќе бидете слободни.

Знам дека сте Авраамово потомство, но сакате да Ме убиете, зашто Мојот збор нема место во вас.

Јас го кажувам она што сум го видел кај Мојот Татко; а вие го правите она што сте го чуле од вашиот татко.“

Му одговорија: „Наш татко е Авраам.“ Исус им рече: „Ако бевте Авраамови деца, ќе ги вршевте Авраамовите дела.

А сега барате да Ме убиете – Мене, Човек Кој ви ја кажа вистината што ја чу од Бог. Авраам не постапи така.

Вие ги вршите делата на својот татко.“ А тие Му рекоа: „Ние не сме родени од блудство; еден татко имаме – Бог.“

Исус им рече: „Ако Бог беше ваш Татко, ќе Ме љубевте, зашто Јас излегов и дојдов од Бог. Не дојдов Сам од Себе, туку Тој Ме испрати.

Зошто не ги разбирате Моите зборови? Затоа што не можете да го слушате Мојот збор.

Ваш татко е ѓаволот, и вие сакате да ги исполнувате желбите на својот татко. Тој беше човекоубиец од почетокот и не остана во вистината, зашто во него нема вистина. Кога зборува лага, зборува од своето, зашто е лажец и татко на лагата.

А бидејќи Јас вистината ви ја кажувам, не Ми верувате.

Кој од вас може да Ме обвини за грев? А ако ја кажувам вистината, зошто не Ми верувате?

Кој е од Бог, ги слуша Божјите зборови. Вие затоа не слушате, бидејќи не сте од Бог.“

Тогаш Јудејците Му одговорија и рекоа: „Не зборуваме ли со право дека си Ти Самарјанин и дека имаш демон?“

Исус одговори: „Јас немам демон, туку Го почитувам Својот Татко, а вие Ме обесчестувате.

Но Јас не ја барам Својата слава; има Друг што ја бара и суди.

Вистина, вистина ви велам: ако некој го пази Мојот збор, нема да види смрт довека.“

Тогаш Јудејците Му рекоа: „Сега знаеме дека имаш демон. Авраам умре, и пророците, а Ти велиш: ‚Ако некој го пази Мојот збор, нема да вкуси смрт довека.‘

Да не си Ти поголем од нашиот татко Авраам, кој умре? И пророците умреа. За кого се сметаш Ти?“

Исус одговори: „Ако се славам Сам, тогаш Мојата слава е ништо; Мојот Татко е Оној што Ме прославува, за Кого вие велите: ‚Тој е наш Бог.‘

Но не Го познавате, а Јас, пак, Го знам. И ако кажам дека не Го познавам, ќе бидам лажец како вие. Но Јас Го знам и го пазам Неговиот збор.

Вашиот татко Авраам се радуваше што ќе го види Мојот ден; го виде и се зарадува.“

Тогаш Јудејците Му рекоа: „Уште немаш ни педесет години – а си го видел ли Авраам?“

Исус им рече: „Вистина, вистина ви велам: пред да се роди Авраам, Јас Сум.“

Тогаш кренаа камења за да фрлат врз Него; но Исус се сокри и излезе од храмот.