Исус Навин

По смртта на Господовиот слуга Мојсеј, Господ му рече на Исус, Навиновиот син, Мојсеевиот помошник:

„Мојот слуга Мојсеј умре. Затоа сега стани, премини преку овој Јордан, ти и целиот овој народ, во земјата што им ја давам на Израелевите синови.

Ви го давам секое место на кое ќе стапне вашето стапало, како што му реков на Мојсеј.

Вашата област ќе се протега од пустината и овој Ливан до големата река Еуфрат, низ целата земја на Хетејците, па сѐ до Големото Море на запад.

Никој нема да може да ти се спротивстави во сите денови на твојот живот. Како што бев со Мојсеј, така ќе бидам и со тебе; нема да те напуштам ниту да те оставам.

Биди силен и храбар, зашто ти ќе му ја разделиш како наследство на овој народ земјата за која им се заколнав на нивните татковци дека ќе им ја дадам.

Само биди силен и многу храбар, за внимателно да постапуваш според целиот закон што ти го заповеда Мојот слуга Мојсеј. Не отстапувај од него ни надесно ни налево, за да напредуваш каде и да одиш.

Оваа книга на законот нека не се оддалечува од твојата уста, туку размислувај за неа дење и ноќе, за внимателно да исполнуваш сѐ што е напишано во неа. Тогаш ќе напредуваш на својот пат и ќе постапуваш мудро.

Не ти ли заповедав: биди силен и храбар? Не плаши се и не обесхрабрувај се, зашто Господ, твојот Бог, е со тебе каде и да одиш.“

Тогаш Исус им заповеда на управителите на народот:

„Поминете низ логорот и заповедајте му на народот: ‚Подгответе си храна за пат, зашто по три дена ќе го преминете овој Јордан, за да влезете и да ја завладеете земјата што Господ, вашиот Бог, ви ја дава во наследство.‘“

А на Рувимовите и Гадовите потомци и на половината од Манасиевото племе, Исус им рече:

„Спомнете си за зборот што ви го заповеда Господовиот слуга Мојсеј, велејќи: ‚Господ, вашиот Бог, ви даде одмор и ви ја даде оваа земја.‘

Вашите жени, вашите деца и вашиот добиток нека останат во земјата што Мојсеј ви ја даде источно од Јордан. А вие, сите способни воини, преминете вооружени пред своите браќа и помогнете им,

додека Господ не им даде одмор и на вашите браќа, како што ви даде вам, и додека и тие не ја завладеат земјата што Господ, вашиот Бог, им ја дава. Потоа вратете се во земјата на своето наследство и завладејте ја земјата што Господовиот слуга Мојсеј ви ја даде источно од Јордан.“

Тие му одговорија на Исус: „Ќе направиме сѐ што ни заповедаш и ќе одиме каде и да нѐ испратиш.

Како што го слушавме Мојсеј во сѐ, така ќе те слушаме и тебе. Само Господ, твојот Бог, нека биде со тебе, како што беше со Мојсеј.

Секој што ќе се спротивстави на твојата заповед и нема да ги послуша твоите зборови во сѐ што ќе му заповедаш, нека биде погубен. Само биди силен и храбар!“