Исус Навин

Тогаш Господ му рече на Исус Навин:

„Кажи им на Израелевите синови: ‚Одредете ги градовите за прибежиште за кои ви зборував преку Мојсеј,

за таму да побегне оној што ненамерно и без предумисла ќе убие човек. Тие нека ви бидат прибежиште од одмаздникот за крв.

Кога некој ќе побегне во еден од тие градови, нека застане на влезот од градската порта и нека им го изложи својот случај на старешините на тој град. Тие нека го примат кај себе во градот, нека му дадат место и тој нека живее меѓу нив.

Ако одмаздникот за крв го гони, тие да не го предаваат убиецот во неговите раце, зашто го убил својот ближен ненамерно и не го мразел отпорано.

Нека живее во тој град сѐ додека не застане на суд пред заедницата и до смртта на првосвештеникот што служи во тоа време. Потоа убиецот може да се врати во својот град и во својот дом, во градот од кој побегнал.‘“

Така го одредија Кедес во Галилеја, во Нефталимовата планинска земја; Шехем во Ефремовата планинска земја; и Киријат-Арва, односно Хеврон, во Јудината планинска земја.

А источно од Јордан, спроти Ерихон, го одредија Восор во пустинската рамнина од Рувимовото племе, Рамот во Галаад од Гадовото племе и Голан во Васан од Манасиевото племе.

Тоа беа градовите одредени за сите Израелеви синови и за придојденците што живееја меѓу нив, за секој што ненамерно ќе убие човек да може да побегне таму и да не биде убиен од одмаздникот за крв пред да застане пред заедницата.