Судии

Израелевите синови повторно правеа зло пред Господ, па Господ ги предаде во рацете на Филистејците четириесет години.

Имаше еден човек од Сараја, од Дановото племе, по име Маное. Неговата жена не можеше да има деца и дотогаш немаше родено.

Господовиот ангел ѝ се јави на жената и ѝ рече: „Ете, досега не можеше да имаш деца и немаш родено, но ќе зачнеш и ќе родиш син.

Затоа внимавај: не пиј вино ниту друг алкохолен пијалак и не јади ништо нечисто.

Зашто ќе зачнеш и ќе родиш син. Брич нека не помине по неговата глава, бидејќи детето ќе биде Божји назиреец уште од мајчината утроба. Тој ќе почне да го избавува Израел од рацете на Филистејците“.

Жената отиде и му кажа на својот маж: „Кај мене дојде еден Божји човек. Изгледаше како Божји ангел и беше многу страшен. Не го прашав од каде е, а ни тој не ми го кажа своето име.

Ми рече: ‚Ќе зачнеш и ќе родиш син. Затоа не пиј вино ниту друг алкохолен пијалак и не јади ништо нечисто, зашто детето ќе биде Божји назиреец од мајчината утроба до денот на својата смрт‘“.

Тогаш Маное Му се помоли на Господ: „Те молам, Господи, Божјиот човек што го испрати нека дојде повторно кај нас и нека нѐ поучи што да правиме со детето што ќе се роди“.

Бог го слушна гласот на Маное. Божјиот ангел повторно дојде кај жената додека седеше во полето, а нејзиниот маж Маное не беше со неа.

Жената брзо истрча и му кажа на својот маж: „Ете, повторно ми се јави човекот што дојде кај мене пред некој ден“.

Маное стана, тргна по својата жена и дојде кај човекот. Го праша: „Ти ли си човекот што зборуваше со оваа жена?“ Тој одговори: „Јас сум“.

Тогаш Маное рече: „Кога ќе се исполни твојот збор, како треба да го воспитуваме детето и што треба да прави тоа?“

Господовиот ангел му одговори на Маное: „Жената нека се пази од сѐ што ѝ кажав.

Нека не јаде ништо што потекнува од лозата, нека не пие вино ниту друг алкохолен пијалак и нека не јаде ништо нечисто. Нека го пази сето она што ѝ го заповедав“.

Маное му рече на Господовиот ангел: „Те молам, дозволи ни да те задржиме додека ти приготвиме едно јаре“.

Но Господовиот ангел му одговори на Маное: „И да ме задржиш, нема да јадам од твојата храна. А ако сакаш да принесеш жртва паленица, принеси Му ја на Господ“. Маное сѐ уште не знаеше дека тоа е Господов ангел.

Потоа Маное го праша Господовиот ангел: „Како ти е името, за да ти оддадеме чест кога ќе се исполни твојот збор?“

Господовиот ангел му одговори: „Зошто прашуваш за моето име? Тоа е чудесно“.

Тогаш Маное го зеде јарето и житниот принос и Му ги принесе на Господ врз карпата. А ангелот направи чудо пред очите на Маное и неговата жена.

Кога пламенот од жртвеникот се издигна кон небото, Господовиот ангел се издигна во пламенот од жртвеникот. Кога го видоа тоа, Маное и неговата жена паднаа со лицата на земја.

Господовиот ангел повеќе не им се појави на Маное и на неговата жена. Тогаш Маное разбра дека тоа беше Господов ангел.

Маное ѝ рече на својата жена: „Сигурно ќе умреме, зашто Го видовме Бог!“

Но неговата жена му одговори: „Кога Господ би сакал да нѐ усмрти, немаше да ја прими од нашите раце жртвата паленица и житниот принос, немаше да ни го покаже сето ова и немаше сега да ни го соопшти сето тоа“.

Жената роди син и го нарече Самсон. Детето растеше, а Господ го благословуваше.

Господовиот Дух почна да дејствува во него во Махане-Дан, меѓу Сараја и Естаол.