Судии

Ова се народите што Господ ги остави, за преку нив да ги испита сите Израелци што не ги искусија сите војни во Ханан,

за подоцнежните поколенија на Израелевите синови, кои порано не знаеја да војуваат, да се научат на војување.

Тоа беа петте филистејски владетели, сите Хананци, Сидонците и Евејците што живееја на Ливанската Гора, од гората Ваал-Ермон до влезот во Емат.

Тие беа оставени за преку нив да биде испитан Израел и да се дознае дали ќе ги слушаат Господовите заповеди што Тој им ги даде на нивните татковци преку Мојсеј.

Така Израелевите синови живееја меѓу Хананците, Хетејците, Аморејците, Ферезејците, Евејците и Јевусејците.

Ги земаа нивните ќерки за жени, ги даваа своите ќерки на нивните синови и им служеа на нивните богови.

Израелевите синови правеа зло пред Господ; Го заборавија Господ, својот Бог, и им служеа на Ваалите и на ашерите.

Тогаш Господовиот гнев пламна против Израел, и Тој ги предаде во рацете на месопотамскиот цар Хусан-Рисатаим. Израелевите синови му служеа осум години.

Кога Израелевите синови повикаа кон Господ, Господ им подигна избавител што ги избави: Готониил, синот на Кенез, помладиот брат на Халев.

Господовиот Дух слезе врз него, и тој му судеше на Израел. Излезе во војна, а Господ му го предаде во раце месопотамскиот цар Хусан-Рисатаим; и неговата рака надвладеа над Хусан-Рисатаим.

Тогаш земјата имаше мир четириесет години. Потоа умре Готониил, синот на Кенез.

Израелевите синови повторно правеа зло пред Господ, па Господ го зајакна моавскиот цар Еглон против Израел, бидејќи правеа зло пред Господ.

Еглон ги собра кај себе Амонците и Амаликијците, тргна и го порази Израел; тие го зазедоа Градот на палмите.

Израелевите синови му служеа на моавскиот цар Еглон осумнаесет години.

Тогаш Израелевите синови повикаа кон Господ, и Господ им подигна избавител: Аод, синот на Гира, Венијаминов потомок, кој беше левак. Преку него Израелевите синови му испратија данок на моавскиот цар Еглон.

Аод си направи меч со две острици, долг околу 45 сантиметри, и го препаша под облеката на десното бедро.

Му го однесе данокот на моавскиот цар Еглон; а Еглон беше многу дебел човек.

Кога заврши со предавањето на данокот, Аод ги испрати луѓето што го носеа.

Но самиот се врати од камените идоли кај Галгал и рече: „Царе, имам тајна порака за тебе“. Царот рече: „Тишина!“ И сите што стоеја кај него излегоа.

Аод му се приближи додека тој седеше сам во ладната горна соба. Аод рече: „Имам Божја порака за тебе“. Тогаш Еглон стана од седиштето.

Аод ја испружи левата рака, го извади мечот од десното бедро и му го заби во стомакот.

И дршката влезе по сечилото, а маснотијата го обви сечилото, зашто Аод не го извлече мечот од неговиот стомак; сечилото излезе одзади.

Потоа Аод излезе низ предворјето, ја затвори вратата од горната соба зад себе и ја заклучи.

Откако излезе, дојдоа слугите. Кога видоа дека вратата од горната соба е заклучена, си рекоа: „Сигурно врши нужда во ладната соба“.

Чекаа додека веќе не им стана непријатно, но тој не ја отвораше вратата. Тогаш го зедоа клучот и отворија, а нивниот господар лежеше мртов на земјата.

Додека тие се двоумеа, Аод избега, ги мина камените идоли и се спаси во Сеира.

Кога пристигна, затруби со труба во Ефремовата планинска земја. Израелевите синови слегоа со него од планината, а тој одеше пред нив.

Им рече: „Одете по мене, зашто Господ ги предаде вашите непријатели, Моавците, во ваши раце“. Тие тргнаа по него, ги зазедоа јорданските премини кон Моав и не пуштија никого да премине.

Во тоа време поразија околу десет илјади Моавци, сѐ силни и храбри мажи; не избега ниту еден.

Така тој ден Моав беше покорен под раката на Израел; а земјата имаше мир осумдесет години.

По него дојде Самегар, синот на Анат, кој со воловски остен уби шестотини Филистејци; и тој го избави Израел.