3 Мојсеева — Левит

Господ му зборуваше на Мојсеј:

„Кажи им на Израелевите синови: Кога жена ќе забремени и ќе роди машко дете, ќе биде нечиста седум дена; ќе биде нечиста како во деновите на својата месечна нечистотија.

На осмиот ден детето нека биде обрежано.

Потоа таа нека остане уште триесет и три дена во периодот на очистување од крвта. Нека не допира ништо свето и нека не влегува во светилиштето сѐ додека не завршат деновите на нејзиното очистување.

Ако роди женско дете, ќе биде нечиста две седмици, како за време на својата месечна нечистотија, а потоа нека остане шеесет и шест дена во очистувањето од својата крв.

Кога ќе завршат деновите на нејзиното очистување, било поради син било поради ќерка, нека му донесе на свештеникот пред влезот на Шаторот на средбата едногодишно јагне како жртва паленица и млад гулаб или грлица како жртва за грев.

Свештеникот нека ги принесе пред Господ и нека изврши помирување за неа, и таа ќе биде очистена од своето крвавење. Тоа е законот за жена што родила машко или женско дете.

Ако нема можност да донесе јагне, нека донесе две грлици или два млади гулаба, едниот како жртва паленица, а другиот како жртва за грев. Свештеникот ќе изврши помирување за неа, и таа ќе биде чиста.“