Матеј

Фарисеите и садукеите Му пристапија и, искушувајќи Го, побараа да им покаже знак од небото.

[Текстуално спорен дел: „А Тој им одговори: ‚Кога се стемнува, велите: Ќе биде ведро, зашто небото е црвено.‘“]

[Текстуално спорен дел: „А наутро велите: ‚Денес ќе има невреме, зашто небото е црвено и намуртено.‘ Лицето на небото знаете да го распознаете, а знаците на времињата не можете?“]

Род лукав и прељубнички бара знак, но знак нема да му се даде освен знакот на Јона.“ Па кога ги остави, си замина.

Кога преминаа на другата страна, Неговите ученици заборавија да земат леб.

Исус им рече: „Внимавајте и чувајте се од квасот фарисејски и садукејски!“

А тие помислија во себе и си рекоа: „Тоа го рече затоа што не зедовме леб?“

Но Исус ги разбра и им рече: „Маловерни, зошто мислите во себе дека немате леб?

Уште ли не разбирате и не се сеќавате на петте лебови за петте илјади, и колку кошеви собравте?

Ниту на седумте лебови за четирите илјади, и колку кошници собравте?

Како не разбирате дека не за леб ви реков: ‚Чувајте се од квасот фарисејски и садукејски!‘“

Тогаш разбраа дека Тој им беше рекол да се пазат не од лебниот квас, туку од фарисејското и садукејското учење.

Кога дојде Исус во пределите на Кесарија Филипова, ги праша Своите ученици: „За кого велат луѓето дека е Човечкиот Син?“

Тие рекоа: „Едни велат Јован Крстител, други Илија, а некои Еремија или еден од пророците.“

А Тој им рече: „А вие, за кого Ме сметате?“

Симон Петар одговори: „Ти си Христос, Синот на живиот Бог.“

Тогаш Исус му одговори и рече: „Блажен си ти, Симоне, сине на Јона, зашто тело и крв не ти го открија тоа, а Мојот Татко, Кој е на небесата.

А Јас ти велам: ти си Петар, и врз оваа карпа ќе ја изградам Својата црква, и вратите на светот на мртвите нема да ја надвладеат.

И ќе ти ги дадам клучевите од небесното царство, и што ќе сврзеш на земјата, ќе биде сврзано на небесата; а што ќе разврзеш на земјата, ќе биде разврзано и на небесата.“

Тогаш Исус им заповеда на Своите ученици да не кажуваат никому дека Тој е Христос.

Оттогаш Исус почна да им открива на Своите ученици дека Тој треба да отиде во Ерусалим и да пострада многу од старешините, првосвештениците и учителите на Законот и да биде убиен, и на третиот ден да воскресне.

А Петар, како Го повлече настрана, почна да Го прекорува, велејќи: „Биди милостив кон Себе, Господи; тоа со Тебе нема да се случи!“

Но Исус се сврте и му рече на Петар: „Оди зад Мене, сатано! Ти си Ми пречка, зашто не мислиш на Божјото, туку на човечкото.“

Тогаш Исус им рече на Своите ученици: „Ако некој сака да оди по Мене, нека се одрече од себе, да го земе својот крст и да оди по Мене;

зашто, кој сака да ја спаси својата душа, ќе ја загуби; а кој ќе ја загуби својата душа заради Мене, ќе ја најде:

Зашто каква полза има човек ако го придобие целиот свет, а ја загуби својата душа? Или каков откуп ќе даде човек за својата душа?

Зашто Човечкиот Син ќе дојде во славата на Својот Татко, со Своите ангели, и тогаш ќе му даде на секој според неговите дела.

Вистина ви велам: меѓу оние што стојат овде има некои што нема да вкусат смрт додека не Го видат Човечкиот Син како доаѓа во Своето царство.“