4 Мојсеева — Броеви

Глава 25

1
Додека Израел живееше во Ситим, народот почна да блудствува со моавските ќерки.
2
И тие го повикуваа народот на жртвите на своите богови; и народот јадеше и им се поклонуваше на нивните богови.
3
Така Израел се прилепи кон Ваал–Фегор; и Господовиот гнев се разгори против Израел.
4
И Господ му рече на Мојсеј: „Земи ги сите народни главари и обеси ги пред Господ, на сонце, за да се одврати жестокиот Господов гнев од Израел.“
5
Тогаш Мојсеј им рече на израелските судии: „Секој од вас нека ги убие своите луѓе, кои се прилепија кон Ваал–Фегор.“
6
И ете, еден од Израелевите синови дојде и доведе кај своите браќа една Мадијанка пред очите на Мојсеј и пред очите на целото собрание на Израелевите синови, додека тие плачеа пред влезот на шаторот на средбата.
7
А кога го виде тоа Финес, синот на Елеазар, синот на свештеникот Арон, стана од средината на собранието, зеде копје во својата рака
8
и влезе по Израелецот во внатрешноста на шаторот и ги прободе обајцата, Израелецот и жената, низ нејзиниот стомак. И ударот врз Израелевите синови запре.
9
А умреа од ударот дваесет и четири илјади.
10
И Господ му рече на Мојсеј:
11
„Финес, синот на Елеазар, синот на свештеникот Арон, го одврати Мојот гнев од Израелевите синови, затоа што покажа Моја ревност меѓу нив, па не ги истребив Израелевите синови во Својата ревност.
12
Затоа кажи: ‚Еве, му го давам Мојот завет на мир.
13
И нему и на неговото потомство по него тоа ќе им биде завет на вечно свештенство, затоа што покажа ревност за својот Бог и изврши помирување за Израелевите синови.‘“
14
А името на убиениот Израелец, кој беше убиен со Мадијанката, беше Зимри, син на Салу, главар на татковски дом од Симеоновците.
15
А името на убиената Мадијанка беше Козби, ќерка на Цур; тој беше главар на народ и на татковски дом во Мадијан.
16
И Господ му рече на Мојсеј:
17
„Нападнете ги Мадијанците и поразете ги,
18
зашто тие ве напаѓаа со својата измама, со која ве измамија во случајот со Фегор и во случајот со Козби, ќерката на мадијанскиот кнез, нивна сестра, која беше убиена во денот на ударот поради Фегор.“