4 Мојсеева — Броеви

Кога Валаам виде дека Му е угодно на Господ да го благослови Израел, не отиде како порано да бара гатање, туку го сврте лицето кон пустината.

И Валаам ги подигна очите и го виде Израел како улогорен според своите племиња; и Божјиот Дух дојде врз него.

Тогаш ја изговори својата изрека и рече: „Вели Валаам, синот Веоров; вели човекот чии очи се отворени;

зборот на оној што ги слуша Божјите зборови, кој гледа видение од Седржителот, паѓа и очите му се отворени:

Колку се убави твоите шатори, Јакове, твоите живеалишта, Израеле!

Како долини што се протегаат, како градини покрај река, како алоеви дрвја што ги насади Господ, како кедри покрај води.

Вода ќе тече од неговите садови, и неговото семе ќе биде во многу води; неговиот цар ќе биде поголем од Агаг, и неговото царство ќе се воздигне.

Бог го изведе од Египет; тој има сила како диво говедо; ќе ги проголта народите, своите непријатели, ќе им ги скрши коските и ќе ги прободе со своите стрели.

Се наведна, легна како лав и како лавица – кој ќе го подигне? Благословен да е секој што те благословува, и проклет секој што те проколнува!“

Тогаш Валаковиот гнев се разгори против Валаам; и тој плесна со своите раце. И Валак му рече на Валаам: „Те повикав да ги проколнеш моите непријатели, а ете, ти веќе трипати само ги благословуваш.

Затоа сега бегај си на своето место! Реков дека многу ќе те почестам, но ете, Господ те лиши од чест.“

А Валаам му рече на Валак: „Зар не им кажав и на твоите гласници што ги испрати кај мене:

‚И да ми ја даде Валак својата куќа полна со сребро и злато, не можам да го престапам Господовиот збор, за да правам добро или зло од себе; што ќе каже Господ, тоа ќе го кажам‘?

И сега, еве, одам кај својот народ; дојди, ќе ти кажам што ќе му направи овој народ на твојот народ во идните денови.“

Тогаш ја изговори својата изрека и рече: „Вели Валаам, синот Веоров; вели човекот чии очи се отворени;

зборот на оној што ги слуша Божјите зборови и го познава знаењето на Севишниот, кој гледа видение од Седржителот, паѓа и очите му се отворени:

Го гледам, но не сега; Го гледам, но не одблиску. Ѕвезда ќе излезе од Јаков, и владетелски стап ќе се подигне од Израел; ќе ги порази челата на Моав и ќе ги разурне сите синови на метежот.

И Едом ќе биде освоен, и Сеир ќе биде освоен од своите непријатели, а Израел ќе покаже сила.

Од Јаков ќе излезе Оној што ќе владее и ќе го истреби остатокот од градот.“

Кога го виде Амалик, ја изговори својата изрека и рече: „Амалик беше прв меѓу народите, но неговиот крај ќе биде вечна пропаст.“

Кога го виде Кенеецот, ја изговори својата изрека и рече: „Цврсто е твоето живеалиште и гнездото ти е поставено на карпа;

Но Кенеецот ќе биде изгорен, додека Асир не те одведе во ропство.“

И пак ја изговори својата изрека и рече: „Тешко! Кој ќе остане жив кога Бог ќе го направи ова?

Но бродови ќе дојдат од Китим, ќе го угнетуваат Асир и ќе го угнетуваат Евер, но и тој ќе дојде до пропаст.“

Тогаш Валаам стана, си отиде и се врати во своето место; а и Валак си замина по својот пат.