4 Мојсеева — Броеви

И Валаам му рече на Валак: „Изгради ми овде седум жртвеници и приготви ми овде седум јунци и седум овни.“

И Валак направи како што рече Валаам, и Валак и Валаам принесоа по еден јунец и по еден овен на секој жртвеник.

Потоа Валаам му рече на Валак: „Застани покрај својата жртва паленица, а јас ќе појдам; можеби Господ ќе ми излезе во пресрет, и што ќе ми покаже, тоа ќе ти го кажам.“ И отиде на едно голо место.

И Бог му излезе во пресрет на Валаам, а тој Му рече: „Ги подготвив седумте жртвеници и принесов по еден јунец и по еден овен на секој жртвеник.“

И Господ стави збор во устата на Валаам и рече: „Врати се кај Валак и вака кажи.“

И се врати кај него, и ете, тој стоеше покрај својата жртва паленица, тој и сите моавски водачи.

Тогаш ја изговори својата изрека и рече: „Валак, моавскиот цар, ме доведе од Арам, од источните гори: ‚Дојди, проколни ми го Јаков; дојди, осуди го Израел!‘

Како да проколнам кого Бог не го проколна? И како да осудам кого Господ не го осуди?

Зашто од врвот на карпите го гледам, и од ридовите го набљудувам: ете, народ што живее одделно и не се смета меѓу народите.

Кој може да го изброи правот на Јаков или да го пресмета четвртиот дел од Израел? Нека умрам со смртта на праведните и нека ми биде крајот како нивниот!“

Тогаш Валак му рече на Валаам: „Што ми направи? Те доведов да ги проколнеш моите непријатели, а ете, ти само благословуваш!“

А тој одговори и рече: „Зар не треба да внимавам да го кажам она што Господ го става во мојата уста?“

И Валак му рече: „Те молам, дојди со мене на друго место, од каде што ќе го видиш; ќе видиш само дел од него, а целиот нема да го видиш; и проколни ми го оттаму.“

И го одведе во полето Цофим, на врвот Фасга; и изгради седум жртвеници, и принесе по еден јунец и по еден овен на секој жртвеник.

Тогаш му рече на Валак: „Застани овде покрај својата жртва паленица, а јас ќе отидам таму да се сретнам со Господ.“

И Господ му излезе во пресрет на Валаам, му стави збор во устата и рече: „Врати се кај Валак и вака кажи.“

Кога дојде кај него, ете, тој стоеше покрај својата жртва паленица, и моавските водачи беа со него. И Валак му рече: „Што кажа Господ?“

Тогаш ја изговори својата изрека и рече: „Стани, Валаку, и чуј; послушај ме, сине Сефоров!

Бог не е човек за да лаже, ниту син човечки за да се премислува. Зарем Тој ќе рече, а нема да направи? Или ќе зборува, а нема да исполни?

Ете, примив заповед да благословувам; Тој благослови, и јас не можам да го променам.

Не гледа неправда во Јаков и не гледа зло во Израел. Господ, неговиот Бог, е со него, и викот на Цар е меѓу него.

Бог ги изведе од Египет; тие имаат сила како диво говедо.

Зашто нема магија против Јаков, ниту гатање против Израел. Во свое време ќе се каже за Јаков и за Израел: ‚Што направи Бог!‘

Ете, народот станува како лавица и се издига како лав; не легнува додека не изеде плен и не ја испие крвта на убиените.“

Тогаш Валак му рече на Валаам: „Ако веќе не го проколнуваш, тогаш барем не го благословувај!“

Но Валаам одговори и му рече на Валак: „Зар не ти кажав: ‚Сѐ што ќе каже Господ, тоа морам да го правам‘?“

И Валак му рече на Валаам: „Те молам, дојди, ќе те одведам на друго место; можеби ќе му биде угодно на Бог да ми го проколнеш оттаму.“

И Валак го одведе Валаам на врвот Фегор, што гледа кон пустината.

И Валаам му рече на Валак: „Изгради ми овде седум жртвеници и приготви ми овде седум јунци и седум овни.“

И Валак направи како што рече Валаам, и принесе по еден јунец и по еден овен на секој жртвеник.