4 Мојсеева — Броеви

Глава 27

1
Тогаш пристапија ќерките на Салпаад, синот на Ефер, синот на Галаад, синот на Махир, синот на Манасија, од семејствата на Манасија, синот Јосифов; а ова се имињата на неговите ќерки: Мала, Ноа, Огла, Мелха и Терса.
2
И застанаа пред Мојсеј и пред свештеникот Елеазар, и пред кнезовите и пред целото собрание, на влезот од шаторот на средбата, велејќи:
3
„Нашиот татко умре во пустината, и не беше меѓу друштвото што се собра против Господ, во Корејовото друштво, туку умре поради својот грев; и немаше синови.
4
Зошто да се избрише името на нашиот татко од неговото семејство затоа што немаше син? Дај ни наследство меѓу браќата на нашиот татко.“
5
И Мојсеј го изнесе нивниот случај пред Господ.
6
Тогаш Господ му рече на Мојсеј:
7
„Право зборуваат ќерките на Салпаад. Навистина дај им наследство меѓу браќата на нивниот татко и пренеси им го наследството на нивниот татко.
8
А на Израелевите синови кажи им: Ако некој човек умре и нема син, пренесете го неговото наследство на неговата ќерка.
9
Ако нема ќерка, дајте го неговото наследство на неговите браќа.
10
Ако нема браќа, дајте го неговото наследство на браќата на неговиот татко.
11
А ако неговиот татко нема браќа, дајте го неговото наследство на неговиот најблизок сродник од неговото семејство, и тој нека го наследи. Тоа нека им биде на Израелевите синови правна уредба, како што Господ му заповеда на Мојсеј.“
12
Господ му рече на Мојсеј: „Искачи се на оваа гора Аварим и погледни ја земјата што им ја дадов на Израелевите синови.
13
Кога ќе ја видиш, и ти ќе се прибереш кај својот народ, како што се прибра и твојот брат Арон,
14
зашто во пустината Син, при препирањето на собранието, се побунивте против Мојата заповед, да Ме осветите кај водата пред нивните очи.“ Тоа е водата на Мерива, во Кадис, во пустината Син.
15
Тогаш Мојсеј Му рече на Господ:
16
„Нека постави Господ, Бог на духовите на секое тело, човек над собранието,
17
кој ќе излегува пред нив и ќе влегува пред нив, кој ќе ги води надвор и ќе ги воведува, за Господовото собрание да не биде како овци што немаат пастир.“
18
И Господ му рече на Мојсеј: „Земи го Исус, синот на Навин, човек во кого има Дух, и положи ја својата рака врз него.
19
Постави го пред свештеникот Елеазар и пред целото собрание, и дај му заповед пред нивните очи.
20
И пренеси на него дел од својот углед, за да го послуша целото собрание на Израелевите синови.
21
И нека стои пред свештеникот Елеазар, кој за него ќе бара одлука преку Урим пред Господ. По неговиот збор ќе излегуваат и по неговиот збор ќе влегуваат, тој и сите Израелови синови со него, и целото собрание.“
22
И Мојсеј направи како што Господ му заповеда; го зеде Исус и го постави пред свештеникот Елеазар и пред целото собрание.
23
И ги положи своите раце врз него и му даде заповед, како што Господ зборуваше преку Мојсеј.