4 Мојсеева — Броеви

Глава 28

1
Господ му рече на Мојсеј:
2
„Заповедај им на Израелевите синови и кажи им: Пазете да Ми го принесувате во неговото време Мојот принос, Мојот леб за Моите огнени жртви, Мојот пријатен мирис.
3
И кажи им: Ова е огнената жртва што ќе Му ја принесувате на Господ: две едногодишни машки јагниња без недостаток секој ден, како постојана жртва паленица.
4
Едното јагне принесувај го наутро, а другото јагне принесувај го навечер.
5
И како житен принос – една десетинка од ефа фино брашно замесено со една четвртина хин истолчено масло.
6
Тоа е постојаната жртва паленица, што беше одредена на гората Синај како пријатен мирис, огнена жртва на Господ.
7
И неговиот наливен принос нека биде една четвртина хин за едно јагне; во светилиштето излевај наливен принос од вино за Господ.
8
И другото јагне принесувај го навечер; како утринскиот житен принос и како неговиот наливен принос, така принесувај го, како огнена жртва, пријатен мирис на Господ.
9
А во саботен ден принесувајте две едногодишни машки јагниња без недостаток, и две десетинки од ефа фино брашно замесено со масло како житен принос, со неговиот наливен принос.
10
Тоа е жртвата паленица за секоја сабота, покрај постојаната жртва паленица и нејзиниот наливен принос.
11
И на почетокот на вашите месеци принесувајте жртва паленица на Господ: два јунци, еден овен и седум едногодишни машки јагниња без недостаток.
12
И три десетинки од ефа фино брашно замесено со масло како житен принос за секој јунец, и две десетинки од ефа фино брашно замесено со масло како житен принос за еден овен,
13
и по една десетинка од ефа фино брашно замесено со масло како житен принос за секое јагне, како жртва паленица, пријатен мирис, огнена жртва на Господ.
14
А нивните наливни приноси нека бидат: половина хин вино за еден јунец, една третина хин за еден овен и една четвртина хин за едно јагне. Тоа е месечната жртва паленица за секој месец во годината.
15
И едно машко јаре за жртва за грев на Господ нека се принесува, покрај постојаната жртва паленица и нејзиниот наливен принос.
16
Во првиот месец, на четиринаесеттиот ден од месецот, е Господовата Пасха.
17
А на петнаесеттиот ден од овој месец е празник; седум дена нека се јаде бесквасен леб.
18
На првиот ден да имате свет собир; никаква тешка работа да не вршите.
19
И принесувајте огнена жртва, жртва паленица на Господ: два јунци, еден овен и седум едногодишни јагниња; нека ви бидат без недостаток.
20
А нивниот житен принос нека биде фино брашно замесено со масло: три десетинки принесувајте за еден јунец, и две десетинки за еден овен.
21
По една десетинка приготви за секое од седумте јагниња.
22
И едно машко јаре како жртва за грев, за да извршите помирување за себе.
23
Тоа принесувајте покрај утринската жртва паленица, што е постојана жртва паленица.
24
Така принесувајте секој ден, седум дена, леб како огнена жртва, пријатен мирис на Господ; нека се принесува покрај постојаната жртва паленица и нејзиниот наливен принос.
25
И на седмиот ден да имате свет собир; никаква тешка работа да не вршите.
26
И на денот на првините, кога ќе Му принесувате нов житен принос на Господ во вашиот празник на седмиците, да имате свет собир; никаква тешка работа да не вршите.
27
И принесувајте жртва паленица за пријатен мирис на Господ: два јунци, еден овен, седум едногодишни јагниња,
28
и нивниот житен принос од фино брашно замесено со масло: три десетинки за секој јунец, две десетинки за еден овен,
29
и по една десетинка за секое од седумте јагниња;
30
и едно машко јаре, за да извршите помирување за себе.
31
Тоа принесувајте покрај постојаната жртва паленица и нејзиниот житен принос; нека ви бидат без недостаток, заедно со нивните наливни приноси.