4 Мојсеева — Броеви

Глава 29

1
И во седмиот месец, на првиот ден од месецот, да имате свет собир; никаква тешка работа да не вршите. Тоа нека ви биде ден на трубен звук.
2
И принесувајте жртва паленица како пријатен мирис на Господ: еден млад јунец, еден овен, седум едногодишни јагниња без недостаток,
3
и нивниот житен принос од фино брашно замесено со масло: три десетинки за еден јунец, две десетинки за еден овен,
4
и една десетинка за секое од седумте јагниња;
5
и едно машко јаре за жртва за грев, за да извршите помирување за себе,
6
покрај жртвата паленица за новата месечина и нејзиниот житен принос, и постојаната жртва паленица и нејзиниот житен принос, и нивните наливни приноси според нивната уредба, како пријатен мирис, огнена жртва на Господ.
7
И на десеттиот ден од овој седми месец да имате свет собир; смирувајте ги своите души и никаква работа да не вршите.
8
И принесувајте жртва паленица на Господ како пријатен мирис: еден млад јунец, еден овен, седум едногодишни јагниња; нека ви бидат без недостаток.
9
И нивниот житен принос од фино брашно замесено со масло: три десетинки за еден јунец, две десетинки за еден овен,
10
и по една десетинка за секое од седумте јагниња;
11
и едно машко јаре за жртва за грев, покрај жртвата за грев за помирување, и постојаната жртва паленица, и нејзиниот житен принос, и нивните наливни приноси.
12
И на петнаесеттиот ден од седмиот месец да имате свет собир; никаква тешка работа да не вршите, и празнувајте Господов празник седум дена.
13
И принесувајте жртва паленица, огнена жртва, пријатен мирис на Господ: тринаесет јунци, два овна, четиринаесет едногодишни јагниња; нека бидат без недостаток.
14
И нивниот житен принос од фино брашно замесено со масло: три десетинки за секој од тринаесетте јунци, две десетинки за секој од двата овна,
15
и по една десетинка за секое од четиринаесетте јагниња;
16
и едно машко јаре за жртва за грев, покрај постојаната жртва паленица, нејзиниот житен принос и нејзиниот наливен принос.
17
А на вториот ден: дванаесет јунци, два овна, четиринаесет едногодишни јагниња без недостаток,
18
со нивниот житен принос и нивните наливни приноси за јунците, за овните и за јагнињата, според нивниот број и според уредбата;
19
и едно машко јаре за жртва за грев, покрај постојаната жртва паленица, нејзиниот житен принос и нивните наливни приноси.
20
А на третиот ден: единаесет јунци, два овна, четиринаесет едногодишни јагниња без недостаток,
21
со нивниот житен принос и нивните наливни приноси за јунците, за овните и за јагнињата, според нивниот број и според уредбата;
22
и едно машко јаре за жртва за грев, покрај постојаната жртва паленица, нејзиниот житен принос и нејзиниот наливен принос.
23
А на четвртиот ден: десет јунци, два овна, четиринаесет едногодишни јагниња без недостаток,
24
со нивниот житен принос и нивните наливни приноси за јунците, за овните и за јагнињата, според нивниот број и според уредбата;
25
и едно машко јаре за жртва за грев, покрај постојаната жртва паленица, нејзиниот житен принос и нејзиниот наливен принос.
26
А на петтиот ден: девет јунци, два овна, четиринаесет едногодишни јагниња без недостаток,
27
со нивниот житен принос и нивните наливни приноси за јунците, за овните и за јагнињата, според нивниот број и според уредбата;
28
и едно машко јаре за жртва за грев, покрај постојаната жртва паленица, нејзиниот житен принос и нејзиниот наливен принос.
29
А на шестиот ден: осум јунци, два овна, четиринаесет едногодишни јагниња без недостаток,
30
со нивниот житен принос и нивните наливни приноси за јунците, за овните и за јагнињата, според нивниот број и според уредбата;
31
и едно машко јаре за жртва за грев, покрај постојаната жртва паленица, нејзиниот житен принос и нејзиниот наливен принос.
32
А на седмиот ден: седум јунци, два овна, четиринаесет едногодишни јагниња без недостаток,
33
со нивниот житен принос и нивните наливни приноси за јунците, за овните и за јагнињата, според нивниот број и според уредбата;
34
и едно машко јаре за жртва за грев, покрај постојаната жртва паленица, нејзиниот житен принос и нејзиниот наливен принос.
35
На осмиот ден да имате свечен собир; никаква тешка работа да не вршите.
36
И принесувајте жртва паленица, огнена жртва, пријатен мирис на Господ: еден јунец, еден овен, седум едногодишни јагниња без недостаток,
37
со нивниот житен принос и нивните наливни приноси за јунецот, за овенот и за јагнињата, според нивниот број и според уредбата;
38
и едно машко јаре за жртва за грев, покрај постојаната жртва паленица, нејзиниот житен принос и нејзиниот наливен принос.
39
Тоа принесувајте Му на Господ во вашите определени празници, покрај вашите заветни дарови, покрај вашите доброволни дарови, за вашите жртви паленици, за вашите житни приноси, за вашите наливни приноси и за вашите жртви за мир.“
40
И Мојсеј им рече на Израелевите синови сѐ што Господ му заповеда.