4 Мојсеева — Броеви

Синовите на Рувим и синовите на Гад имаа многу големо мноштво добиток. И ја видоа земјата Јазер и земјата Галаад, и ете, тоа место беше место за добиток.

И синовите на Гад и синовите на Рувим дојдоа и им кажаа на Мојсеј, на свештеникот Елеазар и на собраниските водачи:

„Атарот, Дивон, Јазер, Нимра, Есевон, Елеале, Севам, Нево и Веон,

земјата што Господ ја порази пред собранието на Израел, е земја за добиток; а твоите слуги имаат добиток.“

И рекоа: „Ако најдовме милост пред тебе, нека им се даде оваа земја на твоите слуги за имот; не нѐ води преку Јордан.“

Но Мојсеј им рече на синовите на Гад и на синовите на Рувим: „Зар вашите браќа да одат во војна, а вие да седите овде?

И зошто им го обесхрабрувате срцето на Израелевите синови да не преминат во земјата што Господ им ја даде?

Така направија и вашите татковци, кога ги испратив од Кадис–Варни да ја извидат земјата.

Кога се искачија до долината Есхол и ја видоа земјата, им го обесхрабрија срцето на Израелевите синови за да не влезат во земјата што Господ им ја даде.

И Господовиот гнев се разгори во тој ден, и Тој се заколна, велејќи:

‚Сигурно ниеден од луѓето што излегоа од Египет, од дваесет години па нагоре, нема да ја види земјата за која им се заколнав на Авраам, Исак и Јаков, зашто не Ме следеа целосно,

освен Халев, синот на Кенезеецот Јефуне, и Исус, синот на Навин, зашто тие Го следеа Господ целосно.‘

И Господовиот гнев се разгори против Израел, и ги остави да талкаат по пустината четириесет години, додека не исчезне целото поколение што правеше зло пред Господ.

И ете, вие дојдовте на местото на своите татковци, пород на грешни луѓе, за уште повеќе да го разгорите жестокиот Господов гнев против Израел.

Ако се одвратите од следењето на Него, Тој пак ќе ги остави во пустината, и вие ќе го упропастите целиот овој народ.“

Тогаш тие се приближија кон него и рекоа: „Овде ќе изградиме торови за својот добиток и градови за своите деца.

А ние самите ќе одиме вооружени и подготвени пред Израелевите синови, додека не ги доведеме на нивното место; а нашите деца ќе живеат во утврдени градови, поради жителите на земјата.

Нема да се вратиме во своите домови, додека секој од Израелевите синови не го прими своето наследство.

Зашто нема да наследуваме со нив од другата страна на Јордан и понатаму, бидејќи нашето наследство ни припадна од оваа страна на Јордан, кон исток.“

Тогаш Мојсеј им рече: „Ако го направите ова, ако се вооружите пред Господ за бој,

и секој од вас вооружен премине преку Јордан пред Господ, додека Тој не ги истера Своите непријатели пред Себе,

и земјата биде покорена пред Господ, потоа вратете се и ќе бидете без вина пред Господ и пред Израел; и оваа земја ќе ви биде имот пред Господ.

Но ако не направите така, ете, згрешивте против Господ, и знајте дека вашиот грев ќе ве стигне.

Изградете си градови за своите деца и торови за своите стада, а што излезе од вашата уста, тоа направете.“

И синовите на Гад и синовите на Рувим му кажаа на Мојсеј: „Твоите слуги ќе направат како што заповеда нашиот господар.

Нашите деца, нашите жени, нашите стада и целиот наш добиток ќе бидат таму, во градовите на Галаад,

а твоите слуги ќе преминат, секој вооружен за војна, пред Господ во бој, како што рече нашиот господар.“

Тогаш Мојсеј им даде заповед за нив на свештеникот Елеазар, на Исус, синот на Навин, и на главарите на татковските домови на израелските племиња.

И Мојсеј им рече: „Ако синовите на Гад и синовите на Рувим преминат со вас преку Јордан, секој вооружен за бој, пред Господ, и земјата биде покорена пред вас, тогаш дајте им ја земјата Галаад за имот.

Но ако не преминат вооружени со вас, тогаш нека добијат имот меѓу вас во ханаанската земја.“

И синовите на Гад и синовите на Рувим одговорија и рекоа: „Како што им рече Господ на твоите слуги, така ќе направиме.

Ние ќе преминеме вооружени пред Господ во ханаанската земја, а имотот на нашето наследство нека ни биде од оваа страна на Јордан.“

Така Мојсеј им ја даде на синовите на Гад, на синовите на Рувим и на половината од племето Манасија, синот Јосифов, земјата на Сихон, аморејскиот цар, и земјата на Ог, васанскиот цар – земјата со нејзините градови во нивните подрачја, градовите на земјата наоколу.

И синовите на Гад ги изградија Дивон, Атарот, Ароир,

Атарот–Софан, Јазер, Јогвеа,

Вет–Нимра и Вет–Аран, утврдени градови, и торови за ситен добиток.

А синовите на Рувим ги изградија Есевон, Елеале, Киријатаим,

Нево и Ваал–Меон – со сменети имиња – и Сивма; и им дадоа други имиња на градовите што ги изградија.

И синовите на Махир, синот Манасиев, отидоа во Галаад, го зазедоа и ги истераа Аморејците што беа во него.

И Мојсеј му го даде Галаад на Махир, синот Манасиев, и тој се насели во него.

А Јаир, синот Манасиев, отиде и ги зазеде нивните села, и ги нарече Јаирови села.

А Нова отиде и го зазеде Кенат и неговите села, и го нарече Нова, според своето име.