Филипјаните

Павле и Тимотеј, слуги на Исус Христос, до сите свети во Христос Исус што се во Филипи, заедно со надгледниците и ѓаконите:

Благодат и мир да имате од Бог, нашиот Татко и од Господ Исус Христос.

Му благодарам на мојот Бог секогаш кога ќе се сетам на вас.

Во секоја своја молитва за сите вас, се молам со радост

поради вашето учество во Евангелието од првиот ден па сѐ досега.

Уверен сум дека Оној Кој го започна доброто дело во вас ќе го доврши до денот на Исус Христос.

Праведно е да мислам така за сите вас, зашто ве носам во своето срце. И во моите окови, и во одбраната и потврдувањето на Евангелието, сите вие сте соучесници со мене во благодатта.

Бог ми е сведок колку копнеам по сите вас со љубовта на Исус Христос.

Се молам вашата љубов сѐ повеќе да изобилува во вистинско знаење и во секое расудување,

за да можете да го распознавате она што е најдобро и да бидете чисти и беспрекорни за Христовиот ден,

исполнети со плодот на праведноста, кој доаѓа преку Исус Христос, за слава и пофалба на Бог.

Браќа, сакам да знаете дека она што ми се случи придонесе за уште поголемо ширење на Евангелието.

Така, на целата царска стража и на сите други им стана јасно дека сум во окови поради Христос.

И повеќето браќа, охрабрени во Господ поради моите окови, се осмелија уште повеќе и без страв да го зборуваат Зборот.

Некои навистина Го проповедаат Христос од завист и препирка, а други од добра волја.

Едните Го проповедаат Христос од љубов, знаејќи дека сум поставен да го бранам Евангелието;

другите Го проповедаат од себични амбиции, а не искрено, мислејќи дека ќе ми нанесат уште поголема неволја додека сум во окови.

Но што од тоа? Во секој случај, било со лоши намери или искрено, Христос се проповеда. На тоа се радувам и ќе продолжам да се радувам.

Зашто знам дека ова, преку вашата молитва и помошта на Духот на Исус Христос, ќе ми послужи за избавување.

Со нетрпение очекувам и се надевам дека во ништо нема да се посрамам, туку со сета смелост, како и секогаш, така и сега, Христос ќе биде возвеличен во моето тело – било со живот, било со смрт.

Зашто за мене животот е Христос, а смртта е придобивка.

Но ако продолжам да живеам во телото, тоа за мене значи плодотворна работа. Сепак, што да изберам, не знам.

Притиснат сум од двете страни: имам желба да заминам и да бидам со Христос, зашто тоа е многу подобро,

но поради вас е попотребно да останам во телото.

Уверен во ова, знам дека ќе останам и ќе бидам со сите вас, за вашиот напредок и радост во верата,

за, кога повторно ќе дојдам кај вас, вашата пофалба во Христос Исус да изобилува поради мене.

Само живејте достојно за Христовото Евангелие. Така, без разлика дали ќе дојдам да ве видам или ќе бидам отсутен, да чујам дека стоите цврсто во еден дух и еднодушно се борите за верата на Евангелието.

и во ништо не се плашете од противниците. Тоа за нив е знак на погибел, а за вас — на спасение, и тоа од Бог.

Зашто вам ви е дадено поради Христос не само да верувате во Него, туку и да страдате за Него,

водејќи ја истата борба што ја видовте кај мене и за која сега слушате.