Ефесјаните

Деца, слушајте ги своите родители во Господ, зашто тоа е праведно.

„Почитувај ги татка си и мајка си“ – тоа е првата заповед со ветување:

„за да ти биде добро и да живееш долго на земјата“.

А вие, татковци, не предизвикувајте ги своите деца на гнев, туку воспитувајте ги со Господово воспитување и поука.

Робови, слушајте ги своите земни господари со страв и трепет и со искрено срце, како да Му служите на Христос.

Не служете само кога ве гледаат, како луѓе што сакаат да им угодат на другите, туку како Христови слуги, извршувајќи ја Божјата волја од срце.

Служете со добра волја, како на Господ, а не на луѓето,

знаејќи дека секој ќе добие од Господ награда за доброто што го направил, било да е роб или слободен.

А вие, господари, постапувајте на ист начин кон нив и престанете да им се заканувате. Знајте дека и нивниот и вашиот Господ е на небесата и дека кај Него нема пристрасност.

Најпосле, зајакнувајте се во Господ и во силата на Неговата моќ.

Облечете ја целата Божја воена опрема, за да можете да им се спротивставите на измамливите замисли на ѓаволот.

Зашто нашата борба не е против крв и тело, туку против владетелствата, властите, светските владетели на оваа темнина и духовните сили на злото во небесните места.

Затоа земете ја целата Божја воена опрема, за да можете да се спротивставите во злиот ден и, откако ќе направите сè, да останете цврсти.

Затоа стојте цврсто: препашајте се со вистината, облечете го оклопот на праведноста

и обујте ги нозете со подготвеноста што ја дава Евангелието на мирот.

Во сите околности земете го штитот на верата, со кој ќе можете да ги изгаснете сите огнени стрели на злобниот.

Земете го и шлемот на спасението и мечот на Духот, кој е Божјиот збор.

Молете се во секое време преку Духот, со секаква молитва и молба. Бидете будни и истрајни во молитвата за сите свети,

а и за мене, за кога ќе ја отворам устата да ми биде даден збор, за смело да ја објавам тајната на Евангелието.

Заради него сум пратеник во окови, за во него смело да зборувам, како што треба да зборувам.

За да знаете и вие како сум и што правам, сè ќе ви соопшти Тихик, саканиот брат и верен служител во Господ.

Го испратив кај вас токму затоа – да дознаете како сме и тој да ги охрабри вашите срца.

Мир на браќата и љубов со вера од Бог, Таткото, и од Господ Исус Христос.

Благодат нека биде со сите што Го љубат нашиот Господ Исус Христос со нераспадлива љубов.