Изреки

Лажната вага Му е одвратна на Господ, а точниот тег Му е угоден.

Кога доаѓа гордоста, по неа доаѓа и срамот; а со понизните е мудроста.

Чесноста ги води праведните, а неверноста ги уништува измамниците.

Богатството нема да помогне во денот на гневот, а праведноста избавува од смрт.

Праведноста на непорочниот му го исправува патот, а безбожниот паѓа поради сопственото зло.

Праведноста ги избавува чесните, а неверните се фаќаат во сопствената алчност.

Кога умира безбожниот, исчезнува и неговата надеж; пропаѓа сето она на што ја полагал својата сила.

Праведниот се избавува од неволја, а безбожниот доаѓа на негово место.

Безбожникот со својата уста го уништува ближниот, а праведните преку знаење се избавуваат.

Кога на праведните им оди добро, целиот град се радува; кога безбожните пропаѓаат, се слуша радосен восклик.

Со благословот на чесните градот се издигнува, а со устата на безбожните се разурнува.

Кој го презира својот ближен покажува дека му недостига расудување, а човекот што има разбирање знае да молчи.

Клеветникот ги открива доверените тајни, а верниот човек знае да ги чува.

Каде што нема мудро водство, народот пропаѓа; а каде што има многу добри советници, таму има сигурност.

Кој гарантира за туѓ човек ќе си навлече неволја, а оној што избегнува такви обврски живее безбедно.

Благородната жена стекнува чест, а силните луѓе стекнуваат богатство.

Милостивиот човек си прави добро и на самиот себе, а суровиот си нанесува зло.

Безбожниот заработува измамлива плата, а оној што сее праведност добива сигурна награда.

Кој цврсто се држи до праведноста оди кон живот, а кој трча по злото оди кон сопствената смрт.

Изопаченото срце Му е одвратно на Господ, а оние што живеат непорочно Му се угодни.

Биди сигурен: злобниот нема да остане неказнет, а потомството на праведните ќе биде избавено.

Како златна алка во рилото на свиња е убава жена што нема здраво расудување.

Желбата на праведните води само кон добро, а надежта на безбожните завршува со гнев.

Еден великодушно раздава, а сепак има сѐ повеќе; друг задржува повеќе отколку што треба, а завршува во сиромаштија.

Дарежливиот човек ќе напредува; оној што ги освежува другите и самиот ќе биде освежен.

Кој го задржува житото, народот ќе го проколнува; а благослов ќе има над главата на оној што го продава.

Кој ревносно го бара доброто наоѓа наклонетост, а кој го бара злото — злото ќе го снајде.

Кој се надева на своето богатство ќе падне, а праведните ќе расцветаат како зелени лисја.

Кој внесува немир во сопствениот дом ќе наследи само ветер, а безумниот ќе му служи на мудриот.

Плодот на праведниот е дрво на животот, а мудриот придобива луѓе.

Ако и праведниот ја прима својата отплата на земјата, колку повеќе безбожниот и грешникот!